Parliament Winter Session : संसदेत घुमला 'जय भीम'चा नारा; भाजपचा काँग्रेसवर प्रहार, गोंधळामुळे कामकाज तहकूब

New Delhi : संसदेच्या हिवाळी अधिवेशनादरम्यान सोमवारी लोकसभेसह राज्यसभेतही ‘जय भीम’चा नारा घुमला. काँग्रेससह इतर विरोधी पक्षांच्या खासदारांनी केंद्रीय गृहमंत्री अमित शहा यांच्या विधानावरून त्यांनी माफी मागण्याची मागणी केली. त्यामुळे दोन्ही सभागृहात गोंधळ निर्माण झाला. त्यावर भाजपच्या नेत्यांनी जोरदार प्रहार केला. त्यानंतर दोन्ही सभागृहांचे कामकाज दुपारी दोन वाजेपर्यंत कामकाज तहकूब करण्यात आले.

संविधानावरील चर्चेला राज्यसभेत उत्तर देताना अमित शाह यांनी आंबेडकरांविषयी केलेल्या विधानावर काँग्रेस जोरदार आक्षेप घेतला आहे. आजकाल आंबेडकरांचे नाव घेण्याची फॅशन झाली आहे. देवाचे नाव घेतले असते तर स्वर्गात जागा मिळाली असती, असे विधान शाह यांनी केले होते.

शाह यांच्या या विधानावरून राजकारण तापले आहे. बुधवारी संसदेचे कामकाज सुरू होताच लोकसभा आणि राज्यसभेत काँग्रेससह इतर विरोधी पक्षांच्या खासदारांनी ‘जय भीम’चा नारा देण्यास सुरूवात केली. शाह यांनी माफी मागण्याची मागणी सदस्यांनी लावून धरली. त्यानंतर लोकसभेत केंद्रीय मंत्री अर्जून राम मेघवाल आणि राज्यसभेत किरण रिजिजू यांनी शाह यांच्या विधानाचे समर्थन करत काँग्रेसवर हल्ला चढवला.

आंबेडकर असताना काँग्रेसने त्यांचा कधीच सन्मान केला नाही. त्यांचा निवडणुकीत पराभव केला. संसदेत येऊ दिले नाही आणि आता त्यांचे फोटो संसदेत आणत आहेत. त्यांना भारतरत्नही भाजपच्या सरकारने दिले, अशी टीका केंद्रीय मंत्र्यांनी केली. यादरम्यान विरोधकांची नारेबाजी सुरूच होती. त्यामुळे दोन्ही सभागृहांचे कामकाज दुपारी दोन वाजेपर्यंत तहकूब करण्यात आले.

संसदेच्या आवारात आंदोलन

अमित शाह यांच्या विधानाविरोधा विरोधकांनी संसदेच्या आवारातही आंदोलन केले. यामध्ये काँग्रेसचे राष्ट्रीय अध्यक्ष मल्लिकार्जून खर्गे, राहुल गांधी, प्रियांका गांधी यांच्यासह काँग्रेस व इतर पक्षांचे नेते सहभागी झाले होते. सर्वांनी हाता आंबेडकरांचे फोटो घेत शाहांनी माफी मागावी, अशा घोषणा देण्यात आल्या.