Bribery case video : धक्कादायक : मंत्र्यांसमोरच मागितली 50 हजारांची लाच; जागेवरून काढले कारवाईचे फर्मान, काही तासांत बडतर्फ

Corruption case : सरकारी अधिकारी आणि कर्मचाऱ्यांकडून विविध कामांसाठी सर्वसामान्य नागरिकांकडून लाच मागण्याचे प्रकार काही कमी होताना दिसत नाहीत. एका कर्मचाऱ्याला तर थेट मंत्र्यांनीच रंगेहाथ पकडले आहे. फोनवरून नागरिकाला ५० हजारांची लाच मागत असतानाचा संपूर्ण संवाद मंत्रीही ऐकत होते. कर्मचाऱ्याची ही मागणी ऐकून धक्का बसलेल्या मंत्र्यांनी जागेवरून कारवाईचे आदेश काढले.

बिहारमधील हा प्रकार आहे. अनुसूचित जाती व अनुसूचित जमाती कल्याण मंत्री लखेंद्र पासवान यांच्या समोर एका सरकारी कर्मचाऱ्याने ५० हजार रुपयांची लाच मागितली होती. विशेष म्हणजे जनसुनावणी दरम्यान सर्वांसमोर घडलेल्या या प्रकारानंतर पासवान यांनी तातडीने संबंधित विभागाच्या अधिकाऱ्यांना कारवाईचे आदेश दिले.

नेमकं काय घडलं?

मंत्री पासवान यांच्याकडून शनिवारी जनसुनावणीचे आयोजन करण्यात आले होते. यावेळी त्यांच्यासमोर भ्रष्टाचाराचे एक प्रकरण आले. सीतामढी येथील एका व्यक्तीने एससी-एसटी कायद्यांतर्गत मिळणारे अनुदान देण्यासाठी टाळाटाळ केली जात असल्याची तक्रार केली. त्यावर मंत्र्यांनी संबंधित कर्मचाऱ्याला तिथूनच पोन करण्यास सांगितले.

फोन केल्यानंतर संबंधित डाटा ऑपरेटरने त्या व्यक्तीकडे ५० हजार रुपयांची मागणी केली. दोघांमधील संवाद मंत्री पासवान हेही ऐकत होते. त्यानंतर पासवान यांनी लगेच जिल्हा कल्याण अधिकाऱ्यांना फोन करत संबंधित कर्मचाऱ्याला लगेच निलंबित करण्याचे आदेश दिले. त्यानंतर प्रशासनाकडून तातडीने संबंधित कर्मचारी चंदन कुमार यांच्याकडून तासाभरात खुलासा मागविला.

चंदन कुमार याचा खुलासा आल्यानंतर प्रशासनाने त्याच्यावर बडतर्फीची कारवाई केली. डीडब्ल्युओ सुभाषचंद्र राजकुमार यांनी सांगितले की, खुलाशानंतर कर्मचाऱ्याला बडतर्फ करण्यात आले आहे. तो कर्मचारी एका एजन्सीचा होता. एजन्सीवर करण्याबाबतही निर्णय घेतला जाऊ शकतो. या कारवाईनंतर बिहार प्रशासनातील कर्मचाऱ्यांमध्ये खळबळ उडाली आहे.