PM Modi and Sandeshkhali News : पंतप्रधान मोदी 'संदेशखाली'तील 'त्या' पीडित महिलांची भेट घेणार?

Modi Visit West Bengal News : पश्चिम बंगालमधील संदेशखालीतील प्रकरावरून सध्या राजकीय वातावरण तापलेलं आहे. भाजपासह विरोधी पक्षांनी तृणमूल काँग्रेसच्या ममता सरकारवर यावरून जोरदार टीका सुरू केली आहे. शिवाय, राष्ट्रीय अनुसूचित जाती आयोगाने राज्यात राष्ट्रपती राजवट लागू करण्याची शिफारस केली असून, याबाबतचा अहवाल राष्ट्रपतींनाही सादर केला आहे. या पार्श्वभूमीवर आता खुद्द पंतप्रधान नरेंद्र मोदी संदेशखालीमधील पीडित महिलांची भेट घेणार असल्याचं बोललं जात आहे.

प्राप्त माहितीनुसार, पंतप्रधान नरेंद्र मोदी(Narendra Modi) 6 मार्च रोजी पश्चिम बंगाल दौऱ्यावर जाणार असून, ते संदेशखालीजवळ एक महिला संमेलनास संबोधित करणार आहेत. पश्चिम बंगालच्या उत्तर 24 परगना जिल्ह्याातील संदेशखाली हे सध्या प्रचंड चर्चेत आहे. येथील महिलांकडून त्यांच्यावार लैंगिक अत्याचार आणि हिंसाचार झाल्याचे आरोप करण्यात आले आहेत.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

संदेशखालीतील प्रकरणावरून भाजपाने मुख्यमंत्री ममता बॅनर्जींविरोधात(Mamata Banerjee) आक्रमक भूमिका घेतलेली आहे. तर प्राप्त माहितीनुसार पंतप्रधान नरेंद्र मोदींचा पश्चिम बंगालचा हा दौरा आगामी लोकसभा निवडणुकीच्या दृष्टीने पश्चिम बंगालमध्ये भाजपाला बळकटी देण्यासाठीही असल्याचे बोलले जात आहे.

काय आहे प्रकरण?

संदेशखालीमधील अनेक महिलांनी तृणमूलचे स्थानिक नेते शाहजहाँ शेख आणि त्यांच्या समर्थकांवर जमीन हडपणे आणि लैंगिक अत्याचाराचे आरोप केले आहेत. रात्रीच्या वेळी ते घरी मुलींना घेऊन जात असल्याचा आरोप महिलांनी केला आहे. महिलांकडून तृणमूलच्या नेत्यांविरोधात आंदोलन केले जात असून, त्याला भाजपाचीही(BJP) साथ मिळत आहे. आरोपींना अटक करण्याची मागणी जोर धरत आहे. मागील महिन्यात शेख यांच्या घरावर ईडीने छापेमारी केली होती. त्यावेळी स्थानिकांनी ईडीच्या अधिकाऱ्यांवर हल्ला केला होता. तेव्हापासून शेख फरार आहेत.

(Edited by - Mayur Ratnaparkhe)