IAS Officer Amneet P Kumar Steps Into Action : हरियाणातील वरिष्ठ आयपीएस अधिकारी पोलीस महानिरीक्षक वाय पूरन कुमार यांच्या आत्महत्येनंतर मोठ्या घडामोडी घडत आहेत. कुमार यांच्या IAS पत्नीने जपानहून परतताच दोन मोठे निर्णय घेत पतीला न्याय मिळवून देण्यासाठी पदर खोचला आहे. थेट मुख्यमंत्र्यांची भेट घेत त्यांनी संपूर्ण राज्यातील पोलीस प्रशासन हादरवून टाकले आहे.
मुख्यमंत्री नायब सैनी यांनी या प्रकरणात लक्ष घालत अनेक महत्वाचे निर्णय घेण्याची तयारी केल्याचे समजते. डीजीपींसह रोहतकच्या पोलीस अधिक्षकांना सक्तीच्या सुट्टीवर पाठविण्यात येणार आहे. तसेच इतर काही वरिष्ठ अधिकाऱ्यांनाही कारवाई सामोरे जावे लागू शकते. त्यामुळे राज्याच्या प्रशासनात खळबळ उडाली आहे.
मुख्यमंत्र्यांसोबतच्या जपान दौऱ्यावरून परतताच पूरन कुमार यांच्या पत्नी आणि आयएएस अधिकारी अमनीत पी कुमार यांनी बुधवारी पोलीस अधिकाऱ्यांची तक्रार दाखल केली. पतीच्या सुसाईड नोटमध्ये अनेक पोलीस अधिकाऱ्यांची नावे घेण्यात आली आहेत. त्यानुसार अमनीत कुमार यांनी हरियाणाचे डीजीपी आणि रोहतच्या एसपी यांनी आपल्या पतीचा मानसिक छळ केला, जातीभेद केला आणि पतीला आत्महत्येस प्रवृत्त केल्याचा आरोप तक्रारीत केला आहे. गुन्हे दाखल झाल्याशिवाय पोस्टमार्टेम करू देणार नाही, असा पवित्राही त्यांनी घेतला आहे.
अमनीत कुमार यांनी मुख्यमंत्र्यांनाही पत्र लिहून चार मागण्या केल्या आहेत. सुसाईड नोट आणि आपल्या तक्रारीत नमूद असलेल्या सर्व व्यक्तींविरोधात तातडीने गुन्हे दाखल करावेत, सर्व आरोपींचे तातडीने निलंबन आणि त्यांना अटक करावी, आपल्या दोन मुलींना सुरक्षा परवावी आणि कुटुंबाची प्रतिष्ठा आणि अधिकारांचे रक्षण केले जावे, या मागण्यांचा समावेश आहे.
पूरन कुमार यांनी मंगलारी आपल्या घराच्या बेसमेंटमध्ये आत्महत्या केली होती. त्यांच्याजवळ सापडलेल्या सुसाईड नोटमध्ये 15 वरिष्ठ अधिकाऱ्यांची नावे आहेत. त्यामध्ये मुख्य सचिवांच्या नावाचाही उल्लेख आहे. सुसाईट नोटमध्ये कुमार यांनी जातीय भेदभाव, सार्वजनिक अपमान आणि मानसिक त्रासाला कंटाळून आत्महत्या करत असल्याचे म्हटले आहे.
पूरन कुमार यांनी सुसाईड नोटसह आपले मृत्यूपत्रही लिहून ठेवले होते. या मृत्यूपत्रानुसार त्यांनी आपली सर्व मालमत्ता पत्नी अमनीत यांच्या नावार केली आहे. त्या जपान दौऱ्यावर असताना पूरन यांनी त्यांना सुसाईट नोट व मृत्यूपत्र पाठविले होते. त्यानंतर अमनीत यांनी लगेचच पतीच्या मोबाईलवर १५ वेळा कॉल केले. पण त्यांनी एकदाही प्रतिसाद दिला आहे. अमनीत यांनी आपल्या मुलीशी संपर्क साधून वडिलांबाबत चौकशी केली. खरेदीसाठी बाहेर गेलेली मुलगी घरी आल्यानंतर तिला वडील रक्ताच्या थारोळ्यात पडल्याचे दिसले होते.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.