Prashant Kishor : मोदींना केंद्रात सत्तेचा मार्ग दाखवणाऱ्या प्रशांत किशोर यांची जादू फेल! बिहारचे एक्झिट पोल काय सांगतात?

Bihar Exit Poll 2025 : बिहारमध्ये दुसऱ्या आणि अंतिम टप्प्यातील मतदान आज पार पडलं. यानंतर काही वेळातच मतदानोत्तर चाचण्यांचे कल अर्थात एक्झिट पोल्स जाहीर झाले आहेत. सात विविध सर्व्हे कंपन्यांनी जाहीर केलेल्या पोलनुसार, पंतप्रधान नरेंद्र मोदी यांना केंद्रात सत्तेचा मार्ग दाखवणाऱ्या आणि बिहारच्या विकासाचं नवं मॉडेल घेऊन निवडणुकीच्या रिंगणात उतरलेल्या राजकीय रणनितीकार प्रशांत किशोर यांची जादू दिसणार नसल्याचं म्हटलं आहे.

कोणाचा पोल काय म्हणतोय?

1. मॅट्रिझ - एनडीए (१४७-१६७), महागठबंधन (७०-९०), जनसुराज्य पार्टी (०-२), इतर (२-८)

2. पी-मार्क - एनडीए (१४२-१६२), महागठबंधन (८०-९८), जनसुराज्य पार्टी (१-४), इतर (०-३)

3. चाणक्य स्ट्रॅटेजिज- एनडीए (१३०-१३८), महागठबंधन (१००-१०८), जनसुराज्य पार्टी (०-०), इतर (३-५)

4. पिपल्स इनसाईट - एनडीए (१३३-१४८), महागठबंधन (८७-१०२), जनसुराज्य पार्टी (०-२), इतर (३-६)

5. पिपल्स प्लस - एनडीए (१३३-१५९), महागठबंधन (७५-१०१), जनसुराज्य पार्टी (०-५), इतर (२-८)

6. जेव्हीसी - एनडीए (१३५-१५०), महागठबंधन (८८-१०३), जनसुराज्य पार्टी (०-१), इतर (३-६)

या सहा पोल्सनं प्रशांत किशोर यांच्या पक्षाला दोन आकडी संख्या गाठता येणार नाही, असं आपल्या पोलमध्ये म्हटलं आहे. त्यामुळं नव्या बिहारचं स्वप्न घेऊन मैदानात उतरलेल्या प्रशांत किशोर यांच्याकडं मात्र बिहारच्या जनतेनं दुर्लक्ष केलंय की काय अशी चर्चा सुरु झाली आहे. अर्थात हे केवळ अंदाज आहेत, प्रत्यक्षात १४ नोव्हेंबर रोजी निकाल जाहीर झाल्यानंतर जे आकडे समोर येतील, त्यानंतरच प्रशांत किशोर यांच्याबाबत नेमकेपणानं भाष्य करता येईल.

दरम्यान, गेल्या निवडणुकीत एक्झिट पोल्सनं वर्तवलेले अंदाज चुकले होते. लोकसभा निवडणुकीवेळी देखील एक्झिट पोल्सची वाट लागली होती. त्यामुळं या एक्झिट पोल्सची म्हणावी अशी विश्वासार्हता दिसून येत नाही. पण प्रत्यक्षात निकालाच्या जवळ जरी हे अंदाज गेले तरी एक्झिट पोल्सचं सर्व्हेक्षण एनडीएचा मात्र मोठा विजय ठरु शकतो.