Rahul Gandhi : राहुल गांधींना सुप्रीम कोर्टाचा मोठा दिलासा : कर्नाटकातील भाजप नेत्याचा डाव उधळला, हायकोर्टाची सुनावणी थांबवली

Rahul Gandhi news : काँग्रेस खासदार आणि लोकसभा विरोधी पक्ष नेते राहुल गांधी यांना सुप्रीम कोर्टानं मोठा दिलासा दिला आहे. त्यांच्यावरील उत्पन्नापेक्षा संपत्ती अधिक असल्याच्या आरोपांशी संबंधीत सुनावणी आज सुप्रीम कोर्टात पार पडली, यावेळी कोर्टानं याच प्रकरणावर सध्या हायकोर्टात सुरु असलेल्या सुनावणीला स्थगिती दिली. तसंच तक्रारदार, सीबीआय, ईडी यांच्यासह संबंधित संबंधित पक्षांना नोटीस पाठवली आहे.

राहुल गांधींनी दिलं होतं आव्हान

राहुल गांधींच्या घोषित उत्पन्नापेक्षा त्यांची संपत्ती अधिक आहे. त्यामुळं या प्रकरणी चौकशी करणं गरजेचं आहे, असं म्हणत कर्नाटकचे भाजप कार्यकर्ते एस. विग्नेश शिशीर यांनी हायकोर्टात याचिका दाखल केली होती. या आरोपांच्या चौकशीसाठी कोर्टाने सीबीआय आणि ईडीला कायद्यांतर्गत योग्य ती कारवाई करण्यासाठी सूट दिली होती. राहुल गांधी यांनी या आदेशाला सुप्रीम कोर्टात आव्हान दिलं होतं.

सुप्रीम कोर्टांन या दोन्ही तपास यंत्रणांना आणि इतर अधिकाऱ्यांना सध्या या प्रकरणी अलाहाबाद हायकोर्टाच्या समोर कुठलाही अहवाल सादर करु नये, असे आदेश दिले आहेत. तसंच जोपर्यंत सुप्रीम कोर्ट या प्रकरणी पुढे सुनावणी करणार नाही, तोपर्यंत यावरील सुनावणी स्थगित ठेवावी, असेही निर्देश दिले आहेत. पण ही अंतरिम स्थगिती असून यावरचा अंतिम निर्णय हा पुढील सुनावणीनंतर होईल.

...तरच पुढील सुनावणीची तारीख निश्चित होणार

सुप्रीम कोर्टाच्या आदेशानंतर सध्या या प्रकरणाशी संबंधित चौकशीचा अहवाल अलहाबाद हायकोर्टात दाखल करता येणार नाही. त्यामुळं २० ऑगस्ट रोजी होणाऱ्या सुनावणीला सुप्रीम कोर्टानं स्थगिती दिली आहे. यानंतर सुप्रीम कोर्ट आता राहुल गांधी यांच्या याचिकेवर पुढील सुनावणी करणार आहे. त्यानंतर संबंधित पक्षांकडून उत्तर आल्यानंतर या प्रकरणाची पुढील दिशा निश्चित होणार आहे.