Rahul Gandhi : अमेरिकेत राहुल गांधींसमोरच सॅम पित्रोदांनी उच्चारला ‘पप्पू’ हा शब्द; नेमकं काय म्हणाले?

New Delhi : काँग्रेसचे नेते राहुल गांधी यांच्याविषयी भाजपच्या नेत्यांकडून अनेकदा ‘पप्पू’ हा शब्द वापरला जातो. त्यावरून राहुलही आपल्याला काहीही म्हटले तरी आपला भाजपविरोधी लढा सुरू राहील, असा पलटवार करतात. सोमवारी अमेरिकेतही राहुल गांधी यांच्यासमोरच काँग्रेस नेत्याने या शब्दाचा उल्लेख केला.

राहुल गांधी सध्या अमेरिकेच्या दौऱ्यावर असून विविध घटकांशी संवाद साधत आहेत. एका कार्यक्रमात इंडियन ओव्हरसीज काँग्रेसचे अध्यक्ष सॅम पित्रोदा यांनी राहुल यांचे खूप कौतुक केले. अनेकदा त्यांच्या विधानांमुळे वाद निर्माण झाला आहे. यावेळी त्यांनी राहुल यांचे कौतुक करताना ते पप्पू नसल्याचे म्हटले आहे.

राहुल गांधी पप्पू नाहीत, खूप शिकलेले आणि समजूतदार आहेत. ते रणनीतीकार आहेत. त्यांचा प्रत्येक विषयाचा गाढा अभ्यास आहे. भाजप त्यांच्याविषयी मागील दहा वर्षे बोलत आहेत. मला राहुल यांच्यावर पूर्ण विश्वास आहे. भारताला जुमल्याची नव्हे तर मॉडर्न विचार आण युवा नेत्यांची गरज असल्याचे पित्रोदा म्हणाले.

मोठ्या मुद्यांवर मार्ग काढणे, हा राहुल गांधींचा अजेंडा आहे. त्यांच्याजवळ व्हिजन असून याउलट त्याविरोधात भाजप कोट्यवधी रुपये खर्च करत असल्याची टीकाही पित्रोदा यांनी केली. पित्रोदा यांनी भारताविषयीचे राहुल यांचे व्हिजन काय आहे, याबाबतही भाष्य केले.

राहुल गांधी हे वडील राजीव गांधी यांच्या तुलनेत अधिक बुध्दिजीवी आणि रणनीतीकार आहेत, असे पित्रोदा यांनी यापूर्वी म्हटले होते. राहुल गांधी यांच्यामध्ये पंतप्रधान बनण्याचे सर्व गुण असल्याचे पित्रोदा यांनी एका मुलाखतीत म्हटले होते. परदेशात राहुल भारताचे नाव खराब करत असल्याचे भाजपचे आरोपही त्यांनी फेटाळून लावले होते.

दरम्यान, राहुल गांधी यांनी अमेरिकेत बोलताना भारत जोडो यात्रा काढण्याचे खरे कारण सांगितले आहे. मीडिया आणि संस्थांकडून आपल्याकडे दुर्लक्ष होत होते. त्यासाठी थेट लोकांमध्ये जाऊन त्यांच्याशी संवाद साधता यावा, यासाठी ही यात्रा काढल्याचे राहुल यांनी सांगितले.