माजी पंतप्रधान राजीव गांधी यांच्या हत्येप्रकरणात दोषी ठरलेले ए. जी. पेरारिवलन आता वकील म्हणून नव्या भूमिकेत समोर आले आहेत. 54 वर्षांचे पेरारिवलन यांनी 27 एप्रिल रोजी अधिकृतरीत्या वकिलीची शपथ घेत काळा कोट परिधान केला आणि तमिळनाडू व पुदुचेरी बार कौन्सिलमध्ये नोंदणी केली.
यानंतर ते आता मद्रास उच्च न्यायालय येथे वकिली करत प्रकरणे लढवणार आहेत. त्यांनी विशेषतः तुरुंगात असलेल्या कैद्यांना कायदेशीर मदत करून न्याय मिळवून देण्यावर लक्ष केंद्रित करण्याची भूमिका स्पष्ट केली आहे.
पेरारिवलन यांना 1991 साली अवघ्या 19 वर्षांच्या वयात अटक करण्यात आली होती. त्यांच्यावर स्फोटक तयार करण्यासाठी वापरल्या गेलेल्या 9 व्होल्ट बॅटरी पुरवल्याचा आरोप होता. या प्रकरणात त्यांनी जवळपास 31 वर्षे तुरुंगवास भोगला. अखेर 18 मे 2022 रोजी सर्वोच्च न्यायालयाने संविधानातील अनुच्छेद 142 अंतर्गत विशेष अधिकार वापरत त्यांची सुटका करण्याचे आदेश दिले.
तुरुंगात असतानाही पेरारिवलन यांनी शिक्षण सुरू ठेवले. त्यांनी डॉ. बाबासाहेब आंबेडकर लॉ कॉलेज मधून कायद्याचे शिक्षण पूर्ण केले आणि 2025 मध्ये ऑल इंडिया बार परीक्षा उत्तीर्ण केली. त्यांच्या नामांकन समारंभाला अनेक वरिष्ठ वकिलांची उपस्थिती होती. आपल्या दीर्घ कायदेशीर लढ्यामुळेच कायदा शिकण्याची प्रेरणा मिळाल्याचे त्यांनी सांगितले. आता अन्यायाने तुरुंगात अडकलेल्या लोकांना मदत करण्याचा त्यांचा निर्धार आहे.
21 मे 1991 रोजी तमिळनाडूमधील श्रीपेरंबदूर येथे निवडणूक सभेदरम्यान राजीव गांधी यांची हत्या झाली होती. या कटात सहभागी असल्याच्या आरोपावरून पेरारिवलन यांना अटक झाली होती. 1999 मध्ये सर्वोच्च न्यायालयाने त्यांच्यासह 26 जणांना फाशीची शिक्षा सुनावली होती.
मात्र पुढील काळात न्यायालयीन प्रक्रियेत बदल झाले. 2013 मध्ये न्यायमूर्ती टी. एस. थॉमस यांनी दीर्घ काळ तुरुंगात ठेवल्यानंतर फाशी देणे योग्य नसल्याचे मत व्यक्त केले. 2014 मध्ये फाशीची शिक्षा जन्मठेपेत बदलण्यात आली.
त्यानंतर त्यांनी राज्यपालांकडे दया याचिका दाखल केली होती, जी अनेक वर्षे प्रलंबित राहिली. 2018 मध्ये राज्य मंत्रिमंडळाने त्यांच्या सुटकेची शिफारस केली. अखेरीस 2022 मध्ये सर्वोच्च न्यायालयाच्या आदेशानंतर त्यांची मुक्तता झाली आणि आता त्यांनी वकिलीच्या माध्यमातून नव्या आयुष्याची सुरुवात केली आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.