Sanjay Raut: "...तर मी राजकारण सोडेन"; संजय राऊतांचं थेट पंतप्रधानांना आव्हान; भाजपला डिवचलं

Shivsena News: शिवसेना नेते आणि राज्यसभा खासदार संजय राऊत यांनी राजकारण सोडण्याची भाषा करत भाजपला पुन्हा एकदा डिवचलं आहे. कारण त्यांनी थेट पंतप्रधान नरेंद्र मोदी यांना आव्हान दिलं असून मोदींनी जर एका गोष्टीचा पुरावा दिला तर आपण राजकारण सोडू असं त्यांनी म्हटलं आहे.नेमका विषय काय?

एका जाहीर कार्यक्रमात बोलताना महाराष्ट्राचे मुख्यमंत्री देवेंद्र फडणवीस यांनी विधान केलं होतं की, "या देशाला आपल्या संविधानानं लोकशाही दिली आहे. या लोकशाहीची खास बात ही आहे की जो देवेंद्र फडणवीस ज्याला कधी हे देखील वाटलं नव्हतं की तो नगरसेवक बनेल, तो मुख्यमंत्रीपदापर्यंत पोहोचला किंवा गुजरातच्या रेल्वे स्टेशनवर चहा विकणारा मुलगा देशाचा प्रधानमंत्री बनला. मग ही ताकद भारताच्या संविधानाची ताकद आहे. ही भारताच्या लोकशाहीची ताकद आहे"

आता फडणवीसांच्या याच विधानावरुन संजय राऊत यांनी थेट मोदींना आव्हान दिलं आहे. "मोदींनी चहा विकला होता, हा पुरावा जर कोणी मला आणून दिला तर मी राजकारण सोडेन. पण मोदी ज्या काळात चहा विकत होते असं सांगतात त्या काळात तिथं रेल्वे स्टेशन अस्तित्वाच नव्हतं. "७१ सालातली ही गोष्ट असून कोणीही कसलाही चहा विकलेला नाही. आपण पाहिलं असेल मोदींचे जे फोटो सध्या प्रसिद्ध होत आहेत. लंडन, अमेरिका, फ्रान्स बालवयात टायसूट घालून शाळेत जात आहेत. भाजपनं या दंतकथा पसरवल्या आहेत," अशा शब्दांत संजय राऊतांनी पंतप्रधान नरेंद्र मोदी यांच्यावर सडकून टीका केली.