Sanjay Raut : देशाचे पंतप्रधान-गृहमंत्री हरवलेत..., संजय राऊतांचा संताप; संसद थेट Insta-Twitter वर चालवण्याचा सल्ला!

शिवसेना (उद्धव बाळासाहेब ठाकरे) पक्षाचे खासदार संजय राऊत यांनी केंद्र सरकारवर जोरदार हल्लाबोल करत पंतप्रधान नरेंद्र मोदी आणि केंद्रीय गृहमंत्री अमित शाह यांच्यावर गंभीर टीका केली. देशातील महत्त्वाच्या प्रश्नांवर संसदेत चर्चा होत नसल्याचा आरोप करत त्यांनी, "देशाचे पंतप्रधान आणि गृहमंत्री हरवलेत. संसद चालवायची नसेल तर ती थेट Insta आणि Twitter वर चालवा," असा टोला लगावला.

अमित शाह यांनी गृहमंत्रीपदावर राहण्याचा नैतिक अधिकार गमावल्याचा दावा करत राऊत म्हणाले, "देशाच्या गृहमंत्री पदावर राहण्याचा अधिकार खरोखर आहे का याच आत्मचिंतन आता भाजपच्या खासदारांनी आणि भाजपच्या इतर पुढाऱ्यांनी करायला पाहिजे. आज आम्ही पुन्हा त्यांना बोलवण्याचा प्रयत्न करू आणि अमित शहांचा राजीनामा मागण्याचा जो आमचा उपक्रम आहे तो चालूच राहील."

आंदोलनाला असंवैधानिक म्हणणाऱ्यांवरही त्यांनी निशाणा साधला. "घटनाविरोधी कसं काय असू शकतं आंदोलन? कोणतंही आंदोलन हे घटनाविरोधी असू शकत नाही," असे स्पष्ट शब्दांत त्यांनी सांगितले. भारतीय संविधानाचा अपमान करणारी भाषा वापरणे चुकीचे असल्याचे म्हणत संजय राऊत यांनी राष्ट्रीय स्वयंसेवक संघावरही टीका केली.

जंतर-मंतरवरील विद्यार्थ्यांच्या आंदोलनाचा उल्लेख करत राऊत म्हणाले, "या देशातला तरुण वर्ग जंतरमंतरवर जमला आणि एका भ्रष्ट शिक्षण मंत्र्याचा राजीनामा मागितला. ज्याच्यामुळे 20 विद्यार्थ्यांनी आत्महत्या केल्या त्याचा राजीनामा मागणं हे घटनाबाह्य आहे असं कोणाला वाटत असेल तर त्या माणसाची मानसिकता तपासावी लागेल."

राम मंदिरातील कथित आर्थिक गैरव्यवहारावरही त्यांनी सरकारला लक्ष्य केले. "राम मंदिरासाठी हिंदूंनी सगळ्या बलिदान केलं. फक्त संघाने किंवा भाजपने नाही. तिथे 550 कोटींची दानपेटी चोरीला जाते, त्यावर आवाज उठवणाऱ्यांवर हल्ले होतात आणि त्याचं समर्थन केलं जातं, हे अत्यंत गंभीर आहे," असा आरोप त्यांनी केला.