Himachal Pradesh : सुखविंदर सिंग सुखू होणार नवे मुख्यमंत्री; थोड्याच वेळात होणार घोषणा

शिमला : तब्बल दोन दिवसांचा काथ्याकूट आणि आमदारांशी ‘वन टू वन’ चर्चा केल्यानंतर हिमाचल प्रदेशच्या (Himachal Pradesh) मुख्यमंत्रीपदासाठी (Chief Minister) सुखविंदर सिंग सुखू (Sukhwinder Singh Sukhu) यांचे नाव निश्चित झाले आहे. काँग्रेस (Congress) पक्षश्रेष्ठींनी सुखविंदर सिंग सुखू यांच्या नावाला मंजुरी दिली आहे. शिमला येथील विधानसभा संकुलात काँग्रेस विधिमंडळ पक्षाची बैठक सुरू आहे. या बैठकीनंतर सुखू यांच्या नावाची घोषणा केली जाणार आहे. (Sukhwinder Singh Sukhu will be the new Chief Minister of Himachal Pradesh)

सुखविंदर सिंग सुखू यांचे नाव मुख्यमंत्रीपदासाठी जाहीर करण्यामागे काँग्रेसच्या श्रेष्ठींच्या मनात पंजाब कनेक्शन असल्याचे सांगण्यात येत आहे. दरम्यान, सुखविंदर सिंग सुखू हे हिमाचल प्रदेश काँग्रेस निवडणूक प्रचार समितीचे विद्यमान अध्यक्ष आहेत. ते नादौन विधानसभा मतदारसंघातून चौथ्यांदा आमदार म्हणून निवडून आले आहेत.

पक्ष निरीक्षक आणि छत्तीसगडचे मुख्यमंत्री भूपेश बघेल, हरियाणाचे माजी मुख्यमंत्री भूपिंदर सिंग हुड्डा आणि हिमाचल प्रदेश काँग्रेसचे प्रभारी राजीव शुक्ला यांनी राजधानी शिमल्याच्या चौरा मैदानावर असलेल्या सिसिल हॉटेलमध्ये प्रत्येक आमदाराची स्वतंत्रपणे भेट घेतली. त्यानंतर सध्या विधानसभेच्या आवारात काँग्रेस आमदारांची बैठक बोलावण्यात आली आहे. ती सध्या सुरू आहे.

काँग्रेस अध्यक्ष मल्लिकार्जुन खर्गे यांनी पक्ष निरीक्षकांना विधिमंडळ पक्षाच्या बैठकीनंतर मुख्यमंत्र्यांच्या नावाची घोषणा करण्यास सांगितले आहे. त्यानुसार सुखविंदर सिंग सुखू यांच्या नावाची घोषणा होणार आहे.