'आप'चा मास्टर प्लॅन ठरला; 9 राज्यांसाठी नऊ जणांवर मोठी जबाबदारी

नवी दिल्ली : पंजाब (Punjab) विधानसभा निवडणुकीत आम आदमी पक्षाने (AAP) भरघोस यश मिळविल्यानंतर देशातील इतर राज्यांमध्ये आपल्या संघटनेचा विस्तार करण्यास सुरुवात केली आहे. विशेष करुन या वर्षी किंवा पुढील वर्षी ज्या राज्यांमध्ये विधानसभेच्या निवडणुका (Assembly Election) आहेत. त्या राज्यांवर आता आपने अधिक लक्ष केंद्रित केले आहे. सध्या आपने नऊ राज्यांमध्ये पक्षाचा विस्तार करताना प्रभारी आणि संघटनेतील लोकांची नावे जाहीर केली आहेत. या राज्यामध्ये दक्षिण भारतातील राज्यांचाही समावेश आहे.

पक्षाच्या वतीने नऊ राज्यांतील नवनियुक्त अधिकाऱ्यांची यादी प्रसिद्ध करण्यात आली आहे. या नऊ राज्यांमध्ये आसाम (Assam), छत्तीसगड (Chhattisgarh), गुजरात (Gujarat), हरियाणा (Haryana), हिमाचल प्रदेश, केरळ, पंजाब, राजस्थान आणि तेलंगणा यांचा समावेश आहे. या राज्यातील प्रभारी आणि संघटनेच्या लोकांची नावे आपने जाहीर केली आहेत. ही माहिती पक्षाच्या वतीने ट्वीट करत देण्यात आली आहे.

पंजाब विधानसभा निवडणुकीत आम आदमी पक्षाने ११७ जागांपैकी ९२ जागा जिंकत ऐतिहासीक विजय मिळवला. या विजयानंतर आता आपने पक्षाच्या राष्ट्रीय विस्तारावर अधिक भर दिला आहे. सध्या पक्षाने नऊ राज्यांमध्ये संघटना विस्तार करण्याचा निर्णय घेतला आहे. आगामी काळात इतर राज्यांमध्येही याचा विस्तार केला जाणार, असल्याचे आपच्या वतीने सांगण्यात येत आहे.