Bishnoi Gang Threat : टायगर श्रॉफवरील हल्ल्याआधी बिश्नोई गँगच्या निशाण्यावर होते माजी आमदार; धक्कादायक माहिती समोर

Tiger Shroff firing case latest update: बिश्नोई गँगने अभिनेता टायगर श्रॉफवर केलेल्या हल्ल्यानंतर बॉलीवूडमध्ये खळबळ उडाली आहे. या गँगने यापूर्वीही अभिनेता सलमान खानसह अनेक राजकीय नेत्यांनाही जीवे मारण्याची धमकी दिली आहे. टायगर श्रॉफवर हल्ल्याच्या आठवडाभर आधीच या गँगने एका माजी आमदाराला धमकी दिल्याचे समोर आले आहे.

राजस्थानातील काँग्रेसचे माजी आमदार संजय लोढा यांना बिश्नोई गँगकडून धमकी फोन आला होता. याबाबत राजस्थान पोलिसांनी गु्न्हा दाखल केला असून तपास सुरू आहे. लोढा यांच्या हत्येचे षडयंत्र समोर आल्यानंतर २० दिवसांनी म्हणजेच ११ ऑक्टोबर रोजी त्यांना परदेशातील मोबाईल नंबरवरून तीन कॉल आले होते. आपण गँगस्टर आरजू बिश्नोई असल्याचे सांगत लोढा यांना जीवे मारण्याची धमकी देण्यात आली होती.

लोढा यांना यापूर्वीही धमकी देण्यात आली होती. त्यांच्या हत्येचे षडयंत्र उघडकीस आले होते. राजस्थान पोलिसांच्या अँटी गँगस्टर टास्क फोर्सनने केलेल्या तपासामध्ये हरियाणातील शूटर साहिल हा या षडयंत्राचा म्होरक्या असल्याचे समोर आले होते. त्यांनी लोढा यांच्या सिरोही जिल्ह्यातील फार्म हाऊसची रेकीही केली होती. त्याचे सीसीटीव्ही फुटेजही समोर आले होते.

पोलिसांनी याचदरम्यान ढोला गावातील हायवेजवळ झाडांमध्ये लपविण्यात आलेली विदेशी बनावटीची हत्यारे, बंदुकीच्या गोळ्याही जप्त केल्या होत्या. पोलिसांनी काही दिवसांपूर्वीच बिश्नोई गँगशी संबंधित दोन शूटर्सना अटक केली होती. लोढा हे त्यांच्या निशाण्यावर असल्याचे तपासात समोर आले होते.

दरम्यान, राजस्थान पोलिसांनी टायगर श्रॉफवरील हल्लाप्रकरणातील तीन हल्लेखोरांना ताब्यात कोटा येथून ताब्यात घेतले आहे. त्यापैकी एक हल्लेखोर अल्पवयीन आहे. तिन्ही आरोपींना मुंबई पोलिसांकडे सोपविले जाणार आहे. मुंबई पोलिसांनी दिलेल्या माहितीनंतर राजस्थान पोलिसांनी तातडीने कारवाई करत तिघांना ताब्यात घेतले. हे तिघे नेपाळला पळून जाण्याच्या प्रयत्नात होते.