Bhupendra Bhayani: केजरीवालांना धक्का; आमदार भूपेंद्र भायाणींचा राजीनामा, भाजपात प्रवेश करणार

Gujarat News: गुजरातमध्ये आम आदमी पार्टीला एक झटका बसला आहे. विसावदर विधानसभा मतदारसंघाचे आपचे आमदार भूपेंद्र भायाणी यांनी राजीनामा दिला आहे. तसेच ते आता भाजपमध्ये प्रवेश करणार असल्याचे निश्चित झाले आहे. विधानसभा अध्यक्ष शंकर चौधरी यांनी भायाणी यांचा राजीनामा स्वीकार केला आहे. त्यांनी भाजपचे उमेदवार हर्षद रिबडिया यांचा पराभव केला होता.

गेल्यावर्षी गुजरात निवडणुकामध्ये आपने पाच जागांवर विजय मिळवला होता. मात्र, आता आम आदमी पार्टीचे विसावदर मतदारसंघाचे आमदार भूपेंद्र भायाणी यांनी विधानसभा सदस्यत्वाचा राजीनामा दिला आहे. आम आदमी पार्टीसाठी हा मोठा झटका मानला जात आहे. भायाणी यांच्या राजीनाम्यामुळे आपच्या गुजरातमधील आमदारांचे संख्याबळ घटले आहे.दरम्यान, आमदार भूपेंद्र भायाणी यांनी राजीनामा दिल्यानंतर आता या ठिकाणी पोटनिवडणूक लागणार आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

भूपेंद्र भायाणी हे पाटीदार समुदायातील नेते आहे. निवडणुकीवेळी त्यांना भाजपने तिकीट नाकारल्यानंतर त्यांनी आपच्या तिकीटावर निवडणूक लढवत विजय मिळवला होता. दरम्यान, निवडणुकीच्या निकालानंतरच त्यांनी भाजपात जाण्यासाठी प्रयत्न सुरू केले होते, अशी चर्चा आहे. अखेर त्यांनी आपल्या आमदारकीचा राजीनामा दिला आहे. आता ते भाजपमध्ये प्रवेश करणार आहेत. दरम्यान, राजीनाम्यानंतर मी पहिल्यापासूनच भाजपमध्ये असल्याची प्रतिक्रिया भायाणी यांनी दिली आहे.

आणखी दोन आमदार देणार राजीनामा ?

भायाणी यांनी राजीनामा दिल्यानंतर आपचे आणखी दोन आमदार राजीनामा देण्याच्या तयारीत असल्याची चर्चा सुरू आहे. बोटाद विधानसभेचे आमदार उमेद मकवाणा आणि गिरियाधर या मतदारसंघाचे सुधीर वाघानी हे दोन आमदार आम आदमी पक्षाला रामराम ठोकण्याच्या तयारीत असल्याची बोलले जात आहे. या दोघांनीही राजीनामा दिल्यास आम आदमी पक्षाकडे गुजरात विधानसभेमध्ये केवळ दोनच उमेदवार शिल्लक असतील.

(Edited by- Ganesh Thombare)