Mamata Banerjee: पश्चिम बंगालमध्ये राजकीय घडामोडी वाढल्या; ममता बॅनर्जींचा निवडणुकीच्या तोंडावर दोन बड्या नेत्यांना झटका

Kolkata News : पश्चिम बंगालमध्ये पुढील वर्षी विधानसभेची निवडणूक होत आहे. त्यासाठी भाजप आणि तृणमूल काँग्रेसकडून जय्यत तयारी सुरू करण्यात आली आहे. विधानसभा निवडणुकीत या दोन्ही पक्षांमध्येच काँटे की टक्कर पाहायला मिळणार आहे. निवडणुकीला सामोरे जाण्याआधी पश्चिम बंगालच्या मुख्यमंत्री ममता बॅनर्जी आणि तृणमूल काँग्रेसच्या प्रमुख नेत्या ममता बॅनर्जी (Mamata Banerjee) यांनी एकापाठोपाठ मोठ्या निर्णयांचा धडाकाच लावला आहे. अशातच त्यांनी तृणमूल काँग्रेसमधील संघटनात्मक बदलावरही भर देतानाच दोन नेत्यांना झटका दिला आहे.

पश्चिम बंगाल विधानसभा निवडणुकीपूर्वी मुख्यमंत्री ममता बॅनर्जी आणि पक्षाचे राष्ट्रीय सरचिटणीस अभिषेक बॅनर्जी यांनी तृणमूल काँग्रेसमध्ये (TMC) संघटनेत जिल्हा पातळीवर मोठे बदल केले आहेत. खासदार सुदीप बंदोपाध्याय यांना उत्तर कोलकाता जिल्हा तृणमूल काँग्रेसच्या अध्यक्षपदावरून हटवण्यात आलं आहे. तर दुसरीकडे बीरभूमचे वजनदार नेते अनुब्रत मंडल यांचे पंखही छाटण्यात आले आहेत.

तृणमूल काँग्रेसकडून शुक्रवारी(ता.16) जिल्हाध्यक्ष आणि अध्यक्षांची यादी जाहीर करण्यात आली आहे. यात बीरभूम तृणमूल काँग्रेसचे जिल्हाध्यक्षपदावरुन अनुब्रत मंडल यांना हटवण्यात आले आहे. पक्षाच्या नेत्या ममता बॅनर्जी यांनी स्थापन केलेली कोअर कमिटी बीरभूम जिल्ह्यातील पक्षाच्या संघटनेची देखरेख करेल, असंही पक्षाने जारी केलेल्या निवेदनात म्हटलं आहे.

उत्तर कोलकाता जिल्हाध्यक्षपदावरून सुदीप यांना पदमुक्त करण्यात आले आहे. अनुब्रत अजूनही नऊ सदस्यांच्या समितीमध्ये आहेत.तथापि,जिल्ह्यात त्यांचं पक्षाध्यक्षपदही अबाधित ठेवण्यात आलं आहे. रामपूरहाटचे आमदार आशिष बॅनर्जी यांच्याकडे ते पद आहे.

तृणमूल काँग्रेसच्या जवळच्या सूत्रांनी दिलेल्या माहितीनुसार, उत्तर कोलकाता जिल्हाध्यक्षपदावरून सुदीप यांना मुक्त करण्यात आले.तसेच उत्तर कोलकातामध्ये बीरभूम मॉडेल तयार करण्यात आले आहे. तृणमूल काँग्रेसचे ज्येष्ठ खासदार सुदीप बंदोपाध्याय हे लोकसभेतील तृणमूल काँग्रेसचे नेते आहेत. त्यांना सभापती पदावरून काढून टाकण्यात आले. त्यांच्या जागी 9 जणांची समिती स्थापन करण्यात आली आहे.

त्या समितीच्या सदस्यांमध्ये अतिन घोष, जीवन साहा, सुदीप बॅनर्जी यांच्या पत्नी नयना बॅनर्जी, परेश पाल, शशी पांजा, सुप्ती पांडे, स्वर्ण कमल साहा, तपन समद्दार आणि विवेक गुप्ता यांचा समावेश आहे. याचा अर्थ स्थानिक आमदार आणि नगरसेवकांचा समावेश असलेली एक कोअर कमिटी स्थापन करण्यात आली आहे.

अनुब्रत मंडलचा मान झाला कमी

एकेकाळी बीरभूम हा अनुब्रत मंडल यांचा बालेकिल्ला म्हणून ओळखला जात होता. त्यांचे संपूर्ण जिल्ह्यावर वर्चस्व होते.परंतु नंतर भ्रष्टाचाराच्या प्रकरणात त्यांची अटक आणि दीर्घ तुरुंगवास यामुळे बीरभूम येथील पक्षसंघटनेत फूट पडली.

एकेकाळी मुख्यमंत्री ममता बॅनर्जी यांनी स्वतः बीरभूमला भेट देण्याची घोषणा केली होती. संघटनेसाठी एक कोअर कमिटी स्थापन करण्यात आली. संस्थेची जबाबदारी कोणत्याही विशिष्ट व्यक्तीची नसून समितीची असंही जाहीर केलं होतं. पण अनुब्रत यांच्या पुनरागमनामुळे कोणताही महत्त्वाचा बदल झाला नाही. बीरभूम मॉडेल लक्षात घेऊन, तृणमूलने उत्तर कोलकात्यातील व्यक्तीवर नाही तर एका समितीवर विश्वास व्यक्त केला आहे.

ममता बॅनर्जी यांचा तृणमूल काँग्रेस 2026 च्या विधानसभा निवडणुकीपूर्वी पक्षसंघटनेत मोठे बदल करण्याची शक्यता आहे. त्याच धर्तीवर पक्षाकडून जिल्हाध्यक्ष आणि अध्यक्ष बदलांची यादी शुक्रवारी जाहीर करण्यात आली. सुदीपच्या भूमिकेवर संघटनेच्या इतर नेत्यांनाही आक्षेप असल्याचे सूत्रांची माहिती आहे.