Shivsena Politics : मुख्यमंत्री शिंदेंच्या समोरच महायुतीतील गटबाजी उघड; वीरेंद्र मंडलिकांच्या उमेदवारीसाठी बॅनर झळकले

Shivsena Politics : मुख्यमंत्री एकनाथ शिंदे आज कोल्हापूर जिल्ह्यातील राधानगरी गारगोटी भुदरगड विधानसभा मतदारसंघाच्या दौऱ्यावर आहेत. मुख्यमंत्री आमदार प्रकाश आबिटकर यांच्या कार्यक्रमात येत असताना त्यांच्यासमोरच महायुतीमधील गटबाजी उघड झाली.

कागल विधानसभा मतदारसंघातून पालकमंत्री हसन मुश्रीफ यांच्या विरोधात भूमिका घेतल्यानंतर मंडलिक गटाच्या कार्यकर्त्यांनी वीरेंद्र मंडलिक यांच्या उमेदवारीची मागणी केली. मुख्यमंत्री कार्यक्रम स्थळी येताच वीरेंद्र मंडलिक यांच्या उमेदवारी मागणारे बॅनर झळकवण्यात आले. त्यानंतर मुख्यमंत्र्यांनी माजी खासदार संजय मंडलिक यांच्याकडे पाहत स्मित हास्य केले.

कार्यकर्त्यांकडून झळकवण्यात आलेल्या बॅनरवर 'चेहरा नवा वीरेंद्र मंडलिक हवा' अशा आशयाचा मजकूर होता. मात्र, या प्रकरामुळे मुख्यमंत्री एकनाथ शिंदे यांच्यासमोर महायुतीतील अंतर्गत गटबाजी उघड झाली.

दरम्यान, माजी खासदार संजय मंडलिक यांचे सुपुत्र वीरेंद्र मंडलिक यांना कागल विधानसभा मतदारसंघातून उमेदवारी द्यावी अशी मागणी कागल-उत्तर-गडहिंग्लज विधानसभा मतदारसंघातील शिवसेनेच्या पदाधिकाऱ्यांनी मुख्यमंत्री एकनाथ शिंदे यांच्याकडे लेखी निवेदनाद्वारे केली आहे.

मुश्रीफांना विरोध?

मंगळवारी मेळावा पार पडल्यानंतर कार्यकर्त्यांसह वीरेंद्र मंडलिक यांनी महाविकास आघाडीच्या संभाव्य उमेदवारापेक्षा महायुतीचेच उमेदवार पालकमंत्री हसन मुश्रीफ यांच्यावर रोष असल्याचे दाखवून दिले. मंडलिक यांनी आपल्या उमेदवारीची घोषणा केल्यानंतर गावागावातील मंडलिक प्रेमी आता मुश्रीफ आणि घाटगे यांच्या विरोधात उघड उघड रस्त्यावर उतरलेले आहेत. महायुतीकडून आपल्याला उमेदवारी द्यावी आणि आता पालकमंत्री हसन मुश्रीफ यांनी थांबावे असं जाहीर आव्हान देत वीरेंद्र मंडलिक यांनी महाविकास आघाडीसह महायुतीचे संभाव्य उमेदवारांना टक्कर देण्याचा प्रयत्न सुरू केला आहे.