Shivsena : पुण्यात शिवसैनिकांमध्ये राडा; आदित्य ठाकरेंनी पाठ फिरताच पदाधिकाऱ्यांमध्ये धक्काबुक्की?

Shivsena Politics : पुण्यातील संकल्प हॉलमध्ये आज शिवसेनेच्या प्रमुख पदाधिकारी आणि कार्यकर्त्यांची बैठक पार पडली. या बैठकीत आदित्य ठाकरे यांनी तीन लोकसभा मतदारसंघांतील विधानसभा निहाय आढावा घेतला. तसेच पक्षाचे 'बीएलए' आणि पक्ष संघटना वाढीबाबत कार्यकर्त्यांना आवश्यक मार्गदर्शन केले.

एकीकडे आदित्य ठाकरे यांनी बैठकीत 'सगळे नेते सोबत' असल्याचा दावा केला असतानाच, ते निघून गेल्यावर मात्र पुणे शिवसेनेतील अंतर्गत कलह समोर आला. आदित्य ठाकरे हॉलमधून बाहेर पडताच काही पदाधिकाऱ्यांमध्ये जोरदार वाद झाला आणि त्याचे रूपांतर धक्काबुक्कीत झाले.

पुणे महापालिका निवडणुकीच्या वेळी तिकीट नाकारण्यात आल्यामुळे काही स्थानिक पदाधिकारी नाराज होते. त्यांना या अंतर्गत वादाबाबत थेट आदित्य ठाकरेंकडे तक्रार करायची होती. नाराज पदाधिकाऱ्याला आदित्य ठाकरेंना भेटू इच्छित होते, मात्र पक्षातीलच काही वरिष्ठ नेत्यांनी आणि कार्यकर्त्यांनी त्यांना ठाकरेंपर्यंत पोहोचू दिले नाही.

यामुळे संबंधित पदाधिकारी प्रचंड संतापले. हा वाद आणि धक्काबुक्की सुरू असतानाच तिथे माध्यमांचे कॅमेरे पोहोचले. माध्यमांचे कॅमेरे समोर दिसताच इतर कार्यकर्त्यांनी तातडीने मध्यस्थी करत चिडलेल्या पदाधिकाऱ्यांची समजूत घातली आणि वाद शांत करण्याचा प्रयत्न केला.