Aditi Tatkare : 'लाडकी बहीण' योजनेतील १५०० रुपये केवळ खर्च करू नका; बचतीचीही सवय लावा : आदिती तटकरेंचा मोलाचा सल्ला

Ladki Bahin Yojana News : विधानसभा निवडणुकीपूर्वी राज्य सरकारने सुरू केलेल्या मुख्यमंत्री माझी लाडकी बहीण योजनेअंतर्गत पात्र महिलांना दरमहा ₹१५०० ची आर्थिक मदत दिली जाते. या योजनेचा लाभ घेत असलेल्या महिलांनी या रकमेचा योग्य वापर करत बचतीलाही प्राधान्य द्यावे, असा सल्ला महिला व बालविकास मंत्री आदिती तटकरे यांनी दिला.

वाशिम येथे नव्याने उभारण्यात आलेल्या महिला व बालकल्याण कार्यालयाच्या लोकार्पण कार्यक्रमात त्या बोलत होत्या. यावेळी त्यांनी महिलांना आर्थिकदृष्ट्या अधिक सक्षम होण्यासाठी मिळणाऱ्या मदतीतील काही रक्कम बचतीसाठी राखून ठेवण्याचे आवाहन केले.

तटकरे म्हणाल्या, "महिलांच्या खात्यात १५०० रुपये जमा झाल्यानंतर बाजारपेठेत खरेदी वाढते, ही आनंदाची बाब आहे. मात्र, संपूर्ण रक्कम खर्च करण्याऐवजी त्यातील ५०० ते १००० रुपये बचत गट, बँक किंवा पतसंस्थेत जमा करून बचतीची सवय लावली, तर भविष्यात त्याचा मोठा फायदा होईल."

यावेळी मंत्री तटकरे यांनी एक अनुभवही सांगितला. "व्यापारीदेखील विचारतात की, लाडक्या बहिणींचे पैसे कधी जमा होणार? कारण पैसे जमा झाल्यानंतर बाजारपेठेत मोठी उलाढाल वाढते," असे त्या म्हणाल्या.

महिलांनी केवळ तात्पुरत्या गरजांसाठीच नव्हे, तर भविष्यातील आर्थिक सुरक्षिततेचाही विचार करून या योजनेतील रकमेचा नियोजनबद्ध वापर करावा, असा संदेश आदिती तटकरे यांनी यावेळी दिला.