Aditya Thackeray : दिशा सालियन प्रकरणावर आदित्य ठाकरे पहिल्यांदाच स्पष्ट बोलले : तब्बल 6 वर्षांच्या आरोपांनंतर ट्विट करत मांडली बाजू

Mumbai News : मुंबई उच्च न्यायालयाच्या आदेशाने दिशा सालियन मृत्यू प्रकरणी दिशाच्या वडील सतीश सालियन यांनी दिलेल्या तक्रारीवरुन एफआयआर दाखल करण्यात आला आहे. आरोपी म्हणून एफआयआरमध्ये कोणाचे नाव नाही. यामध्ये अज्ञात व्यक्तीविरुद्ध गुन्हा दाखल झालेला असताना काही जणांकडून नावे घेतली जात आहेत. त्यामुळे आरोप-प्रत्यारोप सुरु असतानाच आता याप्रकरणी माजी मंत्री आदित्य ठाकरे यांनी 6 वर्षांनी पहिली प्रतिक्रिया दिली आहे. अफवांचा धुरळा उडवणं बंद करण्यासाठी पुन्हा एकदा फक्त आणि फक्त तथ्य सांगतो, असे ट्विट करीत त्यांनी याप्रकरणी स्पष्टीकरण दिले आहे.

या ट्विटमध्ये माजी मंत्री आदित्य ठाकरे म्हणाले की, 'मी दिशा सालियन ह्यांना कधीही भेटलेलो नाही किंवा त्यांच्याशी माझी ओळखही नव्हती. राजकीय हेतूने, वैयक्तिक द्वेषापायी, चारित्र्यहनन करण्याच्या हेतूने काही लोकांकडून गेल्या ६ वर्षांपासून वारंवार ह्या दुर्दैवी घटनेशी कुठलाही पुरावा वा संबंध नसतानाही माझं नाव जोडण्याचा हेतुपुरस्सर प्रयत्न सुरु आहे.

कुठलंही तथ्य आणि सत्य नसलेलं हे सततचं खोटं कॅंपेन दुर्दैवी आहे. बोंबाबोंब करुन केल्या जाणाऱ्या टिव्ही चॅनल्सवरच्या खोट्या चर्चा आणि मिडिया ट्रायल्स सत्य बदलू शकत नाहीत. अधिकृत यंत्रणांना कुठल्याही व्यत्ययाशिवाय, राजकीय हस्तक्षेपाशिवाय, चारित्र्यहननाशिवाय आणि निःपक्षपातीपणे पुन्हा एकदा नव्याने ही चौकशी करु द्या, असेही ते म्हणाले.

परत एकदा सांगतो, ज्यांना वाटत असेल की अश्या चारित्र्यहननाच्या आणि खोट्या प्रचाराच्या मार्गाने तुम्ही आम्हाला शांत बसवू शकाल तर तो तुमचा भ्रम आहे. सत्यासाठी, अन्यायाविरुद्ध, देशवासीयांना सोबत घेऊन आमचा लढा सुरुच राहील, असेही आदित्य ठाकरे यांनी ट्विटमध्ये म्हटले आहे.