NCP Politics : मोठी बातमी! अजित पवारांच्या राष्ट्रवादीचे 22 आमदार शरद पवारांच्या संपर्कात? पटेल, तटकरे भेटीआधीच...

NCP News : सुनेत्रा पवार नेतृत्व करत असलेल्या राष्ट्रवादी काँग्रेसचे 22 आमदार शरद पवारांच्या संपर्कात असल्याचे वृत्त 'साम टिव्ही'ने सुत्रांच्या हवाल्याने दिले आहे. हे आमदार शरद पवारांना देखील भेटून गेले आहेत. त्यानंतर प्रफुल पटेल आणि सुनील तटकरे हे शरद पवारांना भेटले, असे वृत्तात म्हटले आहे.

राष्ट्रवादी काँग्रेस आणि भाजपमध्ये युती आहे. मात्र, राष्ट्रवादीचे आमदार भाजपमध्ये जाऊ शकत नाहीत आणि त्यांच्या मतदारसंघात भाजपचे तगडे उमेदवार आहेत तिथील आमदार शरद पवारांना भेटल्याचे 'साम'च्या वृत्तात म्हटले आहे.

12 मे रोजी सुनील तटकरे हे अचनाक शरद पवारांच्या भेटीला दाखल झाले. शरद पवारांशी भेट झाल्यानंतर त्यांनी माध्यमांशी संवाद साधला होता. पवारसाहेबांची प्रकृतीची विचारपूस करण्यासाठी आपण वेळ मागितला होता. वेळ मिळाल्यानंतर आपण त्यांची भेट घेतल्याचे सांगितले होते. या भेटीचा राजकीय अर्थ न काढू नये, असे देखील त्यांनी म्हटले होते.

सुनील तटकरे यांच्या भेटीनंतर तीन ते चार दिवसांनी तटकरे यांच्या भेटीवेळी प्रफुल पटेल हे देखील उपस्थित असल्याचे वृत्त काही माध्यमांनी दिले होते. तटकरे हे पोहोचण्यापूर्वीच प्रफुल पटेल हे शरद पवारांसोबत होते, असे वृत्तामध्ये म्हटले होते. मात्र, या विषयी अधिकृत पुष्टी प्रफुल पटेल यांच्याकडून करण्यात आली नाही.

राष्ट्रवादीकडून निवडणुकीची तयारी सुरू

उपमुख्यमंत्री सुनेत्रा पवार, पार्थ पवार यांनी प्रशांत किशोर यांची भेट घेतल्याने राष्ट्रवादीकडून 2029 मधील विधानसभा निवडणुकीची तयारी सुरु असल्याची चर्चा आहे.दरम्यान पार्थ पवार यांनी ट्विट करत म्हटले आहे की , प्रशांतजी हे मित्र असून भावासारखे आहेत.

अजितदादांच्या काळापासून त्यांची आमच्याशी ओळख आहे. ते काल शहरात आले होते, त्यामुळे त्यांचे आमच्या घरी जेवणासाठी स्वागत करण्याचा आणि काही अर्थपूर्ण संवाद साधण्याचा आनंद आम्हाला मिळाला.,ते आमच्या सोबत काम करत असल्याच्या काही अटकळांबद्दल मी वस्तुस्थिती स्पष्ट करू इच्छितो की माझ्या माहितीनुसार त्यांनी राजकीय सल्लागार पद सोडून काही वर्षे झाली आहेत. त्यात बदल होईल असे मला वाटत नाही. पण जिथे गरज असेल तिथे आम्ही एकमेकांसाठी नेहमीच उपलब्ध आहोत आणि राहू.