Ajit Pawar : ठाण्याच्या राजकारणात अजितदादांचा जितेंद्र आव्हाडांना जोर का झटका : थेट जिल्हाध्यक्षच फोडला

Thane News : राज्यातील स्थानिक स्वराज्य संस्थेच्या निवडणूका तोंडावर आल्या असल्याने वातावरण तापण्यास सुरुवात झाली आहे. त्यातच गेल्या काही दिवसापासून महाविकास आघाडीला लागलेली गळती कायम असून दिवसेंदिवस महायुतीमधील इनकमिंग वाढत आहे. त्यातच आता राजकीय वर्तुळातून एक मोठी बातमी समोर येत आहे. शरद पवार यांच्या राष्ट्रवादी काँग्रेस पक्षाच्या बड्या नेत्याने अजित पवार यांच्या राष्ट्रवादी काँग्रेसमध्ये प्रवेश केला. त्यामुळे निवडणुकीच्या तोंडावर अजितदादांनी जितेंद्र आव्हाडांना जोर का झटका दिला असून थेट ठाण्यातील जिल्हाध्यक्षच फोडला आहे.

ठाण्यातील शरद पवार (Sharad pawar ) यांच्या राष्ट्रवादी काँग्रेस पक्षाचे जिल्हाध्यक्ष सुहास देसाई यांनी अजित पवार यांच्या राष्ट्रवादी काँग्रेसमध्ये प्रवेश केला आहे. ठाण्यामध्ये उपमुख्यमंत्री अजित पवार यांच्या उपस्थितीत हा पक्षप्रवेश सोहळा पार पडला. देसाई यांनी अजितदादांच्या पक्षात प्रवेश केला असल्याने हा माजी मंत्री जितेंद्र आव्हाड यांच्यासाठी धक्का मानला जात आहे.

राष्ट्रवादी काँग्रेस पक्षाचे ठाणे जिल्हाध्यक्ष असलेल्या सुहास देसाई यांचे ठाण्यात मोठे वर्चस्व होते. त्यामुळे येत्या काळात देसाई यांच्या प्रवेशामुळे ठाण्यातील राजकीय समीकरणे बदलणार आहेत. देसाई यांचा अजित पवार (Ajit pawar) यांच्या उपस्थित झालेला हा पक्ष प्रवेश हा राष्ट्रवादी काँग्रेसमधील अंतर्गत संघर्षाला आणखी धार देणारी आहे. त्यामुळे येत्या काळात ठाण्यातील समीकरण बदलणार आहे.

ठाणे जिल्ह्यातील राजकारणावर एकेकाळी माजी मंत्री जितेंद्र आव्हाड यांचे एकहाती वर्चस्व होते. त्यामुळे या ठिकाणी राष्ट्रवादी काँग्रेस पक्षाची ताकद दिसून येत होती. मात्र, राष्ट्रवादी काँग्रेसमध्ये पडलेल्या उभ्या फुटीनंतर या ठिकाणचे राजकारण ढवळून निघाले होते. त्यामुळे याठिकाणी जितेंद्र आव्हाड यांनी मोठी फूट पडू दिली नव्हती. मात्र, गेल्या काही दिवसापासून मोठ्या प्रमाणात अजितदादांच्या पक्षात प्रवेश होत आहेत. त्यामुळेच देसाई यांचा हा प्रवेश आव्हाड यांच्यासाठी धक्का मानला जात आहे.

ठाणे जिल्ह्यात माजी मंत्री जितेंद्र आव्हाड यांच्या नेतृत्वाखाली राष्ट्रवादी काँग्रेस पक्षाने जिल्ह्यात अभेद ताकद निर्माण केली होती, ज्यामुळे अनेक स्थानिक निवडणुकांमध्ये पक्षाचा दबदबा कायम राहिला. मात्र, ठाण्यातील राष्ट्रवादीचे माजी खासदार आनंद परांजपे यांनी आव्हाड यांची साथ सोडत अजित पवार यांच्या राष्ट्रवादी काँग्रेसमध्ये प्रवेश केला होता. देसाई यांचा प्रवेश ठाणे महापालिका निवडणुकांच्या तोंडावर आव्हाड यांच्यासाठी राजकीय हादरा मानला जात आहे.