BJP-Congress Alliance : CM फडणवीसांनी काँग्रेससोबतची युती लगेचच तोडली; मग रवींद्र चव्हाणांनी 24 तासांत सर्व 12 नगरसेवकांच्या गळ्यात टाकला 'भाजपचा' गमछा

Mumbai News : अंबरनाथ नागरपरिषद निवडणुकीनंतर भाजपने काँग्रेससोबत आघाडी केली होती. या आघाडीवर टीका होताच मुख्यमंत्री देवेंद्र फडणवीस यांनी तातडीने आघाडी तोडण्याच्या सूचना दिल्या. त्यानंतर काँग्रेस प्रदेशाध्यक्ष हर्षवर्धन सपकाळ यांनी काँग्रेसच्या 12 नगरसेवकांना निलंबित केले होते. आता 24 तासांच्या आत या सर्व 12 नगरसेवकांनी भाजपमध्ये प्रवेश केला आहे. भाजपचे प्रदेशाध्यक्ष रवींद्र चव्हाण, वनमंत्री गणेश नाईक यांच्या उपस्थितीत पक्षप्रवेश झाला. या 12 नगरसेवकांना गळाला लावण्यासाठी शिवसेनेकडूनही प्रयत्न सुरु होते.

ठाणे जिल्ह्यातील अंबरनाथ नगरपरिषदेत शिवसेनेला सत्तेपासून दूर ठेवण्यासाठी भाजपने मोठे प्लॅनिंग केले होते. यासाठी भाजप, काँग्रेस आणि राष्ट्रवादी काँग्रेसने एकत्र येत बहुमताचा आकडा गाठला होता. भाजपचे 16, काँग्रेसचे 12 आणि राष्ट्रवादीचे 4 अशा 32 नगरसेवकांनी एकत्र येत शिवसेनेला सत्तेपासून दूर ठेवले होते. पण ही बातमी राज्यभरात वाऱ्यासारखी पसरली. भाजपवर मोठ्या प्रमाणात टीका होऊ लागली.

मुख्यमंत्री देवेंद्र फडणवीस यांनीही या स्थानिक आघाडीवर कमालीची नाराजी व्यक्त केली होती. अखेर त्यांच्याच सुचनेनुसार तातडीने हा युती तोडण्यात आली. पण त्यानंतर काँग्रेसचे प्रदेशाध्यक्ष हर्षवर्धन सपकाळ यांनी 12 नगरसेवकांना थेट काँग्रेसमधून निलंबित केले होते. त्यामुळे काँग्रेस नगरसेवकांची अवस्था बिकट झाली होती.

अंबरनाथ काँग्रेसचे शहराध्यक्ष प्रदीप पाटील यांनी 12 नगरसेवकांसह भाजपमध्ये प्रवेश आहे. हा काँग्रेससाठी मोठा धक्का मानला जात आहे. ऐन महापालिका निवडणुकीपूर्वी हा पक्षप्रवेश होत आहे. दरम्यान यावेळी बोलताना प्रदीप पाटील यांनी काँग्रेसचे प्रदेशाध्यक्ष हर्षवर्धन सपकाळ यांच्यावर गंभीर आरोप केले आहेत.

हर्षवर्धन सपकाळ यांनी माझ्याकडून ब्लॉक अध्यक्ष पदासाठी एक कोटीची मागणी केली, असा आरोप प्रदीप पाटील यांनी केला आहे. हर्षवर्धन सपकाळ यांना या युती संदर्भात आम्ही सांगितले होते, त्यामुळे आता मुख्यमंत्री देवेंद्र फडणवीस आणि रवींद्र चव्हाण यांच्या नेतृत्वात आम्ही लवकरच भाजपमध्ये प्रवेश करत असल्याचे प्रदीप पाटील यांनी स्पष्ट केले.