Chandrashekhar Bawankule : प्रत्येक बुथवर 10 मतांची गरज, महायुती 200 हून अधिक जागा मिळवेल!

Pune : भाजपच्या पुण्यातील अधिवेशनात विधानसभा निवडणुकीचे रणशिंग फुंकले. प्रदेशाध्यक्ष चंद्रशेखर बानवकुळे यांनी कार्यकर्त्यांना ऊर्जा निर्माण करताना त्यांना एका कार्यक्रमही दिला. राज्यात महायुतीचे सरकार आणायचे असेल तर प्रत्येक बुथवर दहा मतांची गरज असल्याचे विधान त्यांनी केले आहे.

लोकसभा निवडणुकीत भाजपचा दारूण पराभव झाला. त्यानंतर रविवारी प्रदेश भाजपचे पहिलेच अधिवेशन होत आहे. यामध्ये बोलताना बावनकुळे यांनी मतांचं गणित मांडलं. युवा, महिलांना मोठ्या प्रमाणात पक्षात आणण्यासाठी काम करायचे असल्याचे त्यांनी सांगितले.

दोन ते चार हजारांच्या फरकाने आपण दहा लोकसभा हरल्या. 60 विधानसभा मतदारसंघात थोडा फरक पडला. आपण अजूनही 85 मतदारसंघात पुढे आहोत. पण जर प्रत्येकाने प्रत्येक बुथवर किमान दहा मत नोंदवली पाहिजे. महायुतीचा भगवा पुन्हा विधानभवनावर फडकवायचा असेल तर प्रत्येक बुथवर दहा मतांची गरज आहे, असे बावनकुळे यांनी स्पष्ट केले.

तुम्ही जर दहा मतांचे राजकारण केले तर महाराष्ट्रात 200 च्यावर जागा महायुती जिंकेल. मला नेतृत्वावर, तुमच्यावर विश्वास आहे. कुणाला मुख्यमंत्री, उपमुख्यमंत्री, आमदार, खासदार करण्यासाठी आपण काम करत नाही. आपण एका निष्ठेने काम करत आहोत. त्यामुळे पुढील चार महिने पक्षावर, नेतृत्वावर श्रध्दा ठेऊन काम करावे, अशी विनंती बावनमुळे यांनी नेते व कार्यकर्त्यांना केली.

महाविकास आघाडीला मिळणारे प्रत्येक मत म्हणजे महायुती सरकार आणि मोदी सरकारच्या योजना बंद करणार करणारे ठरेल. हे चुकून सत्तेत आले तर मोदी सरकारच्या सर्व योजना बंद पाडण्याचे पाप हे सरकार करेल. लाडकी बहीण, शेतकऱ्यांसाठीच्या योजना बंद पाडतील, अशी टीका बावनकुळे यांनी केली.

उद्धव ठाकरे यांनी अडीच वर्षांत सर्व योजना बंद पाडल्या. त्यामुळे या योजन पुढे नेण्यासाठी आपल्या सर्वांना काम करावे लागणार आहे. राज्याच्या हितासाठी आपल्याला जिंकणे महत्वाचे आहे. देशात मोदींचे सरकार पुन्हा आले आहे. त्यामुळे निराश होण्याचे कारण नाही. इथून गेल्यानंतर प्रत्येक बुथवर नवीन संघटना बांधण्याचे काम करायचे आहे, असे बावनकुळे यांनी स्पष्ट केले.