कुख्यात गँगस्टर छोटा राजन याला पुण्यातील शिवसेना नेते अजय भोसले यांच्यावरील गोळीबार प्रकरणात मोठा दिलासा मिळाला आहे. 2009 मध्ये झालेल्या या गोळीबार प्रकरणातून सीबीआयच्या विशेष न्यायालयाने छोटा राजनसह 5 आरोपींची निर्दोष मुक्तता केली आहे. हत्या करण्याचा प्रयत्न, गुन्हेगारी कट रचणे आणि शस्त्रास्त्र कायद्यांतर्गत दाखल करण्यात आलेल्या आरोपांतून न्यायालयाने सर्वांची सुटका केली.
निर्दोष मुक्तता झालेल्या आरोपींमध्ये छोटा राजनसोबत पुण्यातील बांधकाम व्यावसायिक सुरेंद्रकुमार अग्रवाल, मोहम्मद खान, विजय तांबट आणि राजेश यादव यांचा समावेश आहे. या निकालामुळे तब्बल अनेक वर्षांपासून चर्चेत असलेल्या अजय भोसले गोळीबार प्रकरणाला महत्त्वाचे वळण मिळाले आहे.
ही घटना 11 ऑक्टोबर 2009 रोजी पुण्यात घडली होती. शिवसेना नेते अजय भोसले यांच्या कारवर छोटा राजनच्या कथित साथीदारांनी गोळीबार केला होता. या हल्ल्यात भोसले यांना कोणतीही दुखापत झाली नव्हती. मात्र, त्यांच्या वाहनचालकाला गोळी लागून तो जखमी झाला होता.
सरकारी पक्षाच्या दाव्यानुसार, पुण्यातील अग्रवाल कुटुंबातील मालमत्तेच्या वादातून हा गोळीबार घडवून आणण्यात आला होता. सुरेंद्रकुमार अग्रवाल यांचा आर. के. अग्रवाल आणि व्ही. के. अग्रवाल यांच्यासोबत मालमत्तेवरून वाद सुरू होता. हा वाद मिटवण्यासाठी आणि मालमत्तेतील हिस्सा मिळवण्यासाठी सुरेंद्रकुमार यांनी विजय तांबट यांच्याशी संपर्क साधल्याचा आरोप तपास यंत्रणांनी केला होता. तांबट यांचे छोटा राजनशी संबंध असल्याचाही आरोप करण्यात आला होता.
तपासादरम्यान छोटा राजनने आर. के. अग्रवाल यांना फोनवरून धमकी दिल्याचा दावा करण्यात आला होता. तसेच मार्च ते मे 2009 या कालावधीत अजय भोसले यांना छोटा राजनकडून 50 हून अधिक फोन आल्याचा आरोपही सरकारी पक्षाने केला होता.
या प्रकरणाची सुरुवातीला पुण्यातील बंडगार्डन पोलीस ठाण्यात नोंद झाली होती. त्यानंतर तपास महाराष्ट्र सीआयडीकडे सोपवण्यात आला. 2015 मध्ये छोटा राजनला भारतात आणल्यानंतर सीबीआयने त्याच्याविरोधातील इतर प्रकरणांसह या प्रकरणाचाही तपास हाती घेतला.
मात्र, न्यायालयातील सुनावणीदरम्यान छोटा राजनचा या कटात किंवा गोळीबाराच्या प्रयत्नात सहभाग असल्याचे सिद्ध करणारे ठोस पुरावे नसल्याची भूमिका बचाव पक्षाने मांडली. अखेर सीबीआयच्या विशेष न्यायालयाने छोटा राजनसह पाचही आरोपींची सर्व आरोपांतून निर्दोष मुक्तता केली. त्यामुळे अजय भोसले गोळीबार प्रकरणातील न्यायालयीन लढ्याला आता महत्त्वाचे वळण मिळाले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.