Kailas Gorantyal Join BJP : '50 खोके एकदम ओके' घोषणेचे जनक कैलास गोरंट्याल भाजपमध्ये, पहिलं टार्गेट जाहीरपणे सांगितलं

Kailas Gorantyal News : शिवसेनेत फूट पडल्यानंतर एकनाथ शिंदे आणि त्यांच्यासोबत गेलेल्या आमदारांना उद्देशून '50 खोके एकदम ओके' ही पहिली घोषणा तत्कालीन जालनाचे काँग्रेस आमदार कैलास गोरंट्याल यांनी दिली होती. ही घोषणा फारच प्रसिद्ध झाली होती. या घोषणतून आजही एकनाथ शिंदे आणि त्यांच्यासोबत असणाऱ्या डिवचले जाते. मात्र, ज्यांनी ही घोषणा सर्वप्रथम दिली होती. त्याच कैलास गोरंट्याल यांनी काँग्रेसचा 'हात' सोडत भाजपचे 'कमळ' हाती घेतले आहे.

गुरुवारी (ता.31) कैलास गोरंट्याल यांनी आपल्या समर्थकांसह भाजप प्रदेशाध्यक्ष रवींद्र चव्हाण, खासदार अशोक चव्हाण, रावसाहेब दानवे यांच्या उपस्थितीमध्ये भाजपमध्ये प्रवेश केला. यावेळी भाजपमध्ये प्रवेश करण्याचे ठरवले होते पण मुहूर्त लागत नव्हता मात्र तो आज लागला, असे गोरंट्याल यांनी सांगितले.

पक्षप्रवेशावेळी त्यांनी आपले पुढील टार्गेट स्पष्ट करताना म्हटले की, 'मी कोणत्याही अटी न ठेवता भाजपमध्ये आलो आहे. आता आमचे टार्गेट हे स्थानिक स्वराज संस्थांच्या निवडणुका असणार आहेत. या निवडणुकांच्या कामाला लागणार असून जालना महापालिकेत पहिला महापौर भाजपचा करणार आहे.'

अर्जुन खोतकरांना घेरले

जालनाच्या आमदारना एकनाथ शिंदेंच्या शिवसेनेचे अर्जुन खोतकर आहेत. कैलास गोरंट्याल हे त्यांचे प्रमुख विरोधक मानले जातात. खोतकर यांनी विधानसभा निवडणुकीत कैलास गोरंट्याल यांना पराभूत केले होते. मात्र, आता त्यांचा भाजपमध्ये प्रवेश झाल्याने खोतकर यांची अडचण झाली आहे. खोतकर यांनी गोरंट्याल यांच्यावर टीका करताना काँग्रेस सोडणारे गोरंट्याल हेच खरे गद्दार असल्याचे म्हटले आहे.

जालन्यात काँग्रेसला भगदाड

कैलास गोरंट्याल यांच्या भाजप प्रवेशाने जालन्यात काँग्रेसला मोठे भगदाड पडले आहे. गोरंट्याल यांच्यासोबत माजी नगराध्यक्ष संगीताताई गोरंट्याल, क्षय गोरंट्याल, माजी नगरसेवक महावीर ढक्का, शिक्षादेवी ढक्का, जगदीश भारतीया, विजय चौधरी, विनोद रत्नपारखे, संगीता पाजगे, आनंद वाघमारे, ग्रामीणचे सरपंच गोविंद पवार, सुनील चिरखे, सरपंच मनोहर सूळसुळे, अंबादास लोंढे, तालुका उपाध्यक्ष संतोष देव्हडे, माजी सरपंच ज्ञानेश्वर मोरे, बाळूकाका सिरसाट, किशोर कावले, पंचायत समिती माजी सदस्य समाधान शेजुळ आदींनी भाजपमध्ये प्रवेश केला.