Sunetra Pawar New Responsibility : फडणवीस सरकारमध्ये सुनेत्रा पवारांना आणखी एक मानाचे स्थान : अजितदादांच्या जागी प्रमुख समितीमध्ये एन्ट्री

राज्यातील फडणवीस सरकारमध्ये सुनेत्रा पवार यांना आणखी एक महत्त्वाची जबाबदारी देण्यात आली आहे. मंत्रिमंडळ पायाभूत सुविधा समितीच्या पुनर्रचनेत त्यांचा समावेश करण्यात आला आहे. मुख्यमंत्री देवेंद्र फडणवीस यांच्या नेतृत्वाखालील सरकारमध्ये आता सुनेत्रा पवार यांना या महत्त्वाच्या समितीत स्थान देण्यात आले आहे. विशेष म्हणजे, याआधी या समितीत अजित पवार यांचा समावेश होता. त्यांच्या जागी सुनेत्रा पवार यांची नियुक्ती करण्यात आली आहे.

नियोजन विभागाच्या शासन निर्णयानुसार १० मार्च २०२५ रोजी स्थापन करण्यात आलेल्या मंत्रिमंडळ पायाभूत सुविधा समितीची फेररचना करण्याचा निर्णय सरकारने घेतला होता. त्यानुसार आता या समितीची नवीन यादी जाहीर करण्यात आली आहे. या समितीच्या अध्यक्षपदी मुख्यमंत्री देवेंद्र फडणवीस आहेत.

उपमुख्यमंत्री एकनाथ शिंदे सदस्य म्हणून कार्यरत राहतील, तर सुनेत्रा पवार यांची सदस्य म्हणून नव्याने एन्ट्री झाली आहे. याशिवाय महसूल मंत्री चंद्रशेखर बावनकुळे, वैद्यकीय शिक्षण मंत्री हसन मुश्रीफ आणि उद्योग व मराठी भाषा मंत्री उदय सामंत यांचाही समितीत समावेश करण्यात आला आहे.

या समितीचे सचिव म्हणून राज्याचे मुख्य सचिव काम पाहतील. समितीसमोर मांडण्यात येणारे सर्व प्रस्ताव मुख्य सचिवांमार्फत सादर केले जातील. बैठकीत चर्चेला येणाऱ्या विषयानुसार संबंधित विभागाचे मंत्रीही निमंत्रित केले जाणार आहेत. यामुळे विविध विभागांमध्ये समन्वय साधण्यास मदत होणार आहे.

नियोजन, वित्त तसेच विधी व न्याय विभागाचे वरिष्ठ अधिकारी समितीचे स्थायी निमंत्रित सदस्य असतील. आवश्यकतेनुसार इतर अधिकाऱ्यांनाही बैठकीसाठी बोलावले जाईल. समितीसमोर सादर होणारे प्रस्ताव नियोजन विभागाने निश्चित केलेल्या नियमांनुसार तपासूनच पुढे पाठवले जातील.

मंत्रिमंडळ पायाभूत सुविधा समिती ही राज्यातील मोठ्या प्रकल्पांना गती देण्यासाठी आणि पायाभूत सुविधा विकासासंबंधी महत्त्वाचे निर्णय घेण्यासाठी स्थापन करण्यात आलेली आहे. त्यामुळे या समितीत सुनेत्रा पवार यांचा समावेश हा त्यांच्या वाढत्या राजकीय प्रभावाचा संकेत मानला जात आहे. या बदलामुळे प्रशासनात आणि राजकारणात पुढील घडामोडींना वेग येण्याची शक्यता व्यक्त केली जात आहे.