CM Fadnavis Foot March : दिल्लीत काँग्रेसचा मोर्चा, ठाण्यात मुख्यमंत्री देवेंद्र फडणवीस रस्त्यावर उतरले, पदयात्रेतून निशाणा; म्हणाले,...

Devendra Fadnavis News : दिल्लीत काँग्रेसकडून मुख्य निवडणूक आयुक्त ज्ञानेश कुमार यांच्या राजीनाम्यासाठी रामलिला मैदानावर आंदोलन करत आहेत. देशभरातून काँग्रेस कार्यकर्ते आंदोलनासाठी दिल्लीत जमले आहे. काँग्रेसच्या या आंदोलनाला भाजपने विरोध करत 'नौटंकी' संबोधले आहे. त्यातच आज ठाण्यात मुख्यमंत्री देवेंद्र फडणवीस आणि उपमुख्यमंत्री एकनाथ शिंदे हे रस्त्यावर उतरले. पदयात्रा काढून त्यांनी राहुल गांधींच्या भूमिकेवर जोरदार टीका केली. लोकतंत्र बचाओ, अराजकता हटाओ अभियानद्वारे पदयात्राचे आयोजन करण्यात आले होते.

मुख्यमंत्री देवेंद्र फडणवीस म्हणाले, डॉ. बाबासाहेब आंबेडकरांचे संविधान आणि देशाची लोकशाही वाचवण्यासाठी देशभक्त नागरिक रस्त्यावर उतरले असून, ही पदयात्रा देशातील अराजकतेच्या विरोधात काढली आहे.

पुढे बोलताना ते म्हणाले, मतदारयादी शुद्धीकरणाच्या एसआयआर प्रक्रियेत अडीच कोटी मृत मतदारांची नावे मतदारयादीतून काढून टाकल्याबद्दल काँग्रेस पक्षाला इतके दुःख का होत आहे. यापूर्वी काँग्रेसच्या काळात आठ वेळा एसआयआर झाला होता. आताच्या प्रक्रियेत निवडणूक आयोगाने प्रत्येक राजकीय पक्षाला बूथ स्तरावर बीएलओ देण्याचा आणि चुकीचे नाव कट झाले असल्यास हरकत अर्ज नोंदवण्याचा अधिकार दिला आहे. संपूर्ण देशात काँग्रेसच्या एकाही बीएलओने नाव चुकीचे कट केल्याचा एकही अर्ज दिलेला नाही, कारण त्यांना माहिती आहे की कट केलेली नावे चुकीची नाहीत.

जिथे नाव कट तेथे तृणमूल विजयी

मुख्यमंत्री म्हणाले, पश्चिम बंगालमध्ये ज्या २० जागांवर सर्वाधिक नावे कट झाली, त्यांपैकी १३ जागांवर तृणमूल काँग्रेस निवडून आली आहे. SIR मुळे बांगलादेशी घुसखोरांची नावे मतदारयादीतून बाहेर पडत असल्यामुळेच विरोधक विरोध करत आहेत असा आरोप त्यांनी केला

जनता मोदींच्या मागे

जोपर्यंत मतदारयादीतील शेवटच्या बांगलादेशी घुसखोराचे नाव हटवले जात नाही, तोपर्यंत हा संघर्ष सुरू राहील; मतदानाचा अधिकार केवळ भारतीय नागरिकांनाच असेल, असे त्यांनी स्पष्ट केले. तसेच या लढ्यामागे आंतरराष्ट्रीय ताकदी, सोशल मीडियाचे अल्गोरिथम आणि पैशांचा मोठा वापर सुरू आहे. छत्रपती शिवाजी महाराजांचे मावळे म्हणून ही अराजकता मुळासकट उपटून फेकून, पंतप्रधान मोदींच्या नेतृत्वात 'विकसित भारत' घडवेपर्यंत हा लढा थांबणार नाही, असा विश्वास त्यांनी व्यक्त केला.