Dhananjay Munde : धनंजय मुंडेंचे मंत्रिपद फिक्स! 'या' मंत्र्याला मिळणार नारळ, तानाजी सावंतांनाही गुड न्यूज!

Dhananjay Munde News : संतोष देशमुख हत्या प्रकरणानंतर धनंजय मुंडे यांचे निकटवर्तीय वाल्मिक कराड यांना अटक करण्यात आले. त्यानंतर मुंडे यांनी प्रकृतीचे कारण देत राजीनामा दिला होता. राजीनाम्याच्या सहा महिन्यानंतर आपल्याला रिकामे ठेवू नका, हाताला काम द्या,जबादारी द्या अशी मागणी धनंजय मुंडेंनी राष्ट्रवादी काँग्रेसचे प्रदेशाध्यक्ष सुनील तटकरेंकडे जाहीर कार्यक्रमात केली होती. त्यानंतर धनंजय मुंडे पुन्हा मंत्रिमंडळात येणार असल्याच्या चर्चा सुरू झाल्या होत्या.

धनंजय मुंडे यांचे मंत्रिपद फिक्स असून स्थानिक स्वराज संस्था निवडणुकीच्या पार्श्वभूमीवर त्यांना मंत्रि‍पदाची संधी मिळणार असल्याचे वृत्त एका वर्तमान पत्राने दिले आहे. विश्वसनीय सुत्रांचा हवाला देताना पुढील आठवड्यात मंत्रिमंडळाचा विस्तार होणार असून मुंडेंना मंत्रिपद मिळणार असल्याचे या वृत्तात म्हणण्यात आले आहे.

धनंजय मुंडे हे मंत्रिमंडळात एन्ट्री होत असताना कुठल्या मंत्राला नारळ मिळणार याची देखील चर्चा आहे. अन्न व औषध प्रशासन मंत्री नरहरी झिरवळ यांचा राजीनामा घेत मुंडेंना संधी दिली जाईल, असे देखील विश्वसनीय सुत्रांच्या हवाल्याने सांगितले जात आहे. दरम्यान, राष्ट्रवादी काँग्रेस पक्षाकडून याबाबत कोणीही अधिकृत वक्तव्य केले नाही.

तानाजी सावंत यांना संधी

तानाजी सावंत यांना मंत्रिमंडळात संधी मिळाली नव्हती. त्यामुळे ते नाराज होते. पक्षाच्या कार्यक्रमाला तसेच विधीमंडळ अधिवेशनाला देखील ते गैरहजर होते. त्यामुळे सावंत यांच्या नाराजीच्या चर्चा वाढल्या होत्या. मात्र, काही दिवसांपूर्वी उपमुख्यमंत्री एकनाथ शिंदे यांनी सावंत यांना मुंबईत अचानक बोलावून घेतले होते. त्यामुळे सावंत यांना मंत्रिमंडळात संधी मिळणार असल्याची सांगितले जात आहे.