Shivsena News : एकनाथ शिंदेंच्या शिवसेनेतून बड्या नेत्याची हकालपट्टी; 'हे' आहे कारण

Nandurbar News : नुकत्याच झालेल्या विधानसभा निवडणुकीत महायुतीने घवघवीत यश मिळवले आहे. त्यामुळे महायुतीचे कॉन्फिडन्स चांगलेच वाढले आहे. त्यामुळे आता पक्षविरोधी कारवाया करणाऱ्या नेतेमंडळींवर कारवाई केली जात आहे. विशेषतः या निवडणुकीत महायुतीच्या अधिकृत उमेदवाराऐवजी अपक्ष उमेदवारांचा प्रचार करणाऱ्याची पक्षातून हकालपट्टी केली आहे. विधानसभा निवडणुकीत धडगाव अक्कलकुवा मतदारसंघात शिवसेना शिंदे गटाचे जिल्हाप्रमुखाने पक्षविरोधी काम केल्याने पक्षातून सहा वर्षासाठी हकालपट्टी करण्यात आली.

नुकत्याच झालेल्या विधानसभा निवडणुकीत धडगाव अक्कलकुवा मतदारसंघात महायुतीच्या वरिष्ठ स्तरावरील नेतृत्वाने विधान परिषद सदस्य आमश्या पाडवी यांना उमेदवारीसाठी संधी दिली होती. त्यांच्या विरोधात माजी खासदार तथा अपक्ष उमेदवार डॉ. हिना गावित यांनी बंडखोरी केली होती. या बंडखोर उमेदवाराचा प्रचार करण्यासाठी शिवसेना (Shivsena) शिंदे गटाचे जिल्हाप्रमुख किरसिंग वसावे यांनी पक्षविरोधी भूमिका घेतली होती. त्यामुळे संपर्कप्रमुख तथा माजी आमदार चंद्रकांत रघुवंशी यांनी किरसिंग वसावे यांची पक्षातून हकालपट्टी केली.

या निवडणुकीच्या कालावधीत किरसिंग वसावे यांनी भाजप (Bjp), शिवसेना शिंदे गट व राष्ट्रवादी काँग्रेस पार्टी (अजित पवार गट) महायुतीचे अधिकृत उमेदवार आमश्या पाडवी यांच्या प्रचार न करता अपक्ष उमेदवार हिना गावित यांचा प्रचार केला. यामुळे त्यांच्यावर पक्षविरोधी कामाचा ठपका ठेवण्यात आला होता.

धडगाव-अक्कलकुवा विधानसभा मतदारसंघातील पदाधिकाऱ्यांनी पक्ष नेतृत्वाकडे याबाबत वारंवार मागणी केली होती. त्यानुसार, किरसिंग वसावे यांची सहा वर्षांसाठी पक्षातून हकालपट्टी करण्यात आली आहे. याबाबतची माहिती शिवसेना संपर्कप्रमुख तथा माजी आमदार चंद्रकांत रघुवंशी यांनी दिली आहे.

अक्कलकुवा तालुक्यातील मोलगी ग्रामीण रुग्णालयास जिल्हा उपरुग्णालयाचा दर्जा मिळाला आहे. यावरून शिंदेंच्या शिवसेनेचे विधान परिषद आमदार आमश्या पाडवी व शिंदे शिवसेनेचे जिल्हाध्यक्ष किरसिंग वसावे यांच्यात श्रेयवादाची लढाई रंगली होती. त्यावेळी आमदार पाडवी यांनी जिल्हाध्यक्ष वसावे यांच्यावर जहरी टीका केली आहे. त्यानंतर आता त्यांची पक्षातून हाकलपट्टी केली आहे.