Municipal Elections Delay : महापालिका निवडणूक पुन्हा लांबणीवर? अंतिम मतदारयाद्यांना विलंब लागल्याने संभ्रम

Municipal Elections News : आगामी महापालिका निवडणुकीसाठी प्रभागनिहाय मतदारयाद्या जाहीर करण्याची अंतिम तारीख 10 डिसेंबर होती. या तारखेनंतर तीन ते चार दिवसांमध्ये निवडणूक जाहीर होण्याची शक्यता होती. मात्र, मतदारयाद्या जाहीर करण्यास नवीन डेडलाईन देण्यात आली आहे. त्यामुळे महापालिका निवडणूका पुढे जाणार का? याची भीती व्यक्त केली जात आहे.

10 डिसेंबर ऐवजी आता 15 डिसेंबरला अंतिम मतदारयाद्या जाहीर होणार आहे. तसेच मतदान केंद्राची यादी 15 डिसेंबर ऐवजी 20 डिसेंबरला जाहीर होणार आहे. त्यामुळे निवडणूक जाहीर होण्यास विलंब होईल, अशी चर्चा आहे. मात्र, मतदारयाद्या जाहीर करण्यास उशीर होत असला तरी जानेवारीच्या तिसऱ्या आठवड्यात निवडणुका होण्याची शक्यता आहे, असे वृत्त एका मराठी वृत्तपत्राने दिले आहे.

रखडलेल्या स्थानिक स्वराज संस्था निवडणुका जानेवारी अखेरपर्यंत घेण्याचे निर्देश सुप्रीम कोर्टाने दिले होते. दरम्यान, दोन महापालिका आणि काही जिल्हा परिषदांमध्ये 50 टक्के आरक्षणाची मर्यादा ओलांडल्याचे समोर आले आहे. कोर्टाने निवडणूका घेण्यास परवानगी देत 50 टक्के आरक्षणाच्या बाबतीत सुनावणी घेणार असल्याचे सांगितले आहे. त्यामुळे डिसेंबरमध्ये जिल्हा परिषदेच्या निवडणुका होण्याची शक्यता होती. ती मावळली असून जिल्हा परिषद निवडणुका देखील जानेवारी महिन्यात होणार आहे.

राजकीय पक्ष लागले कामाला

15 डिसेंबरला अंतिम मतदारयाद्या प्रसिद्ध होणार आहेत. त्यामुळे पुढील काही दिवसांतच निवडणूक जाहीर होईल. त्यामुळे महापालिकेसाठी सर्वच राजकीय पक्ष कामाला लागले आहेत. उमेदवारी निवडणुकीची प्रक्रिया देखील सुरू करण्यात आली आहे. मात्र, अजुनही आघाडी, महायुती होणार की नाही याचे चित्र स्पष्ट झालेले नाही. मुंबईत भाजप स्वबळाचा नारा देण्याची शक्यता असताना एकनाथ शिंदेंच्या शिवसेनेकडून त्यांना 125 जागा देण्याचा प्रस्ताव देण्यात येणार असल्याची माहिती आहे.