Harshwardhan Sapkal: हर्षवर्धन सपकाळांकडून एक पाऊल मागे! व्यक्त केली दिलगिरी; छत्रपती शिवराय अन् टिपू सुलतान संदर्भातील वाद मिटवला

Harshwardhan Sapkal: मालेगाव महापालिकेतील उपमहापौरांच्या दालनात केवळ टिपू सुलतानची तसबीर भिंतीवर लावलेला फोटो सोशल मीडियात मोठ्या प्रमाणावर व्हायरल झाला होता. यावरुन वाद सुरु झाल्यानंतर त्यावर प्रतिक्रिया देताना काँग्रेसचे प्रदेशाध्यक्ष हर्षवर्धन सपकाळ यांनी छत्रपती शिवाजी महाराज आणि टिपू सुलतान यांच्याबाबत तुलनात्मक विधान केलं. त्यांच्या या विधानावरुन भाजपनं त्यांना टार्गेट करत रान पेटवलं. पुण्यात काँग्रेसभवनवर केलेल्या आंदोलनादरम्यान दगफेकीची घटना घडली त्यात काँग्रेसचे काही कार्यकर्ते आणि पत्रकार मंडळी जखमी झाले होते. त्यानंतर मुख्यमंत्र्यांनी सपकाळांवर सडकून टीका केली. इतरही लोक सोशल मीडियातून हा विषय धगधगत ठेवण्याचा प्रयत्न करत असल्यानं अखेर हर्षवर्धन सपकाळ यांनी याप्रकरणी दिलगिरी व्यक्त केली आहे. यासंदर्भात त्यांनी पोस्ट करत लांबलचक पोस्ट लिहीत आपली बाजू मांडली आणि दिलगिरीही व्यक्त केली.

हर्षवर्धन सपकाळ म्हणाले,

शिवप्रेमी बंधू-भगिनींनो, सप्रेम नमस्कार

सरकारी कार्यालयांमध्ये विविध महापुरुषांचे फोटो एकत्र लावल्याने समाजात तेढ निर्माण होणार नाही, तर ऐक्याचा संदेश जावा, या आशयाचे माझे ७० सेकंदांचे वक्तव्य होते. दुर्दैवाने, त्या विधानातील एका शब्दाचा संदर्भ तोडून जाणीवपूर्वक विपर्यास करण्यात आला. सोशल मीडियावर दिशाभूल करणाऱ्या मोहिमा चालवून मी जे बोललोच नाही ते माझ्या तोंडी घालण्यात आले आणि छत्रपती शिवाजी महाराजांची तुलना केली, असा चुकीचा समज निर्माण करण्यात आला. भारतीय जनता पक्ष आणि त्यांच्या पिलावळीकडून हा अपप्रचार नियोजनपूर्वक पसरवण्यात आला. त्याआधारे राज्यात धार्मिक तेढ निर्माण करून दंगली घडवण्याचा प्रयत्न झाला हे आपण पुण्यात पाहिले आहे.

मी पुन्हा एकदा स्पष्ट आणि ठामपणे सांगतो, छत्रपती शिवाजी महाराजांचा पराक्रम अद्वितीय आहे. ते माझे आदर्श, प्रेरणास्थान आणि स्वाभिमान आहेत. त्यांच्या तुलनेचा प्रश्नच उद्भवत नाही. टिपू सुलतानांनी छत्रपती शिवाजी महाराजांचा आदर्श आणि त्यांच्याकडून प्रेरणा घेऊन इंग्रजाविरूद्ध लढा दिल्याचे मी म्हटले होते. त्यांच्या योगदानाची दखल घेत थेट भारताच्या संविधानामध्ये देखील त्यांची तसबीर आहे त्यांच्या प्रतिमेच्या संदर्भात समाजात तणाव वाढू नये, सर्वांनी परस्पर सन्मान आणि बंधुभाव जपावा, हा माझ्या वक्तव्याचा गाभा होता. इतिहासावर मतभेद असू शकतात; मात्र त्यावर संयत, अभ्यासपूर्ण चर्चा व्हावी आणि समाजात संघर्ष निर्माण होऊ नये, जात-धर्म-पंथावर ध्रुवीकरण अजिबात खपवून घेता कामा नये हीच भूमिका मी मांडली होती. प्रकरणी भाजपचा तीव्र शब्दात निषेध करतो त्यांच्या गलिच्छ खोडसाळपणामुळं काही शिवप्रेमी बांधवांच्या भावना दुखावल्या गेल्या, त्याबद्दल मी मनःपूर्वक खेद व्यक्त करतो. माझ्या शब्दाचा गैरवापर केल्याबद्दल शिवप्रेमींप्रती दिलगीरी व्यक्त करतो. कोणाच्याही भावनांना ठेच पोहोचवण्याचा माझा हेतू नव्हता.

शिवजयंती दोन दिवसांवर आली आहे, आपण सर्वांनी गैरसमज दूर ठेवूयात अपप्रचाराला बळी पडू नका. छत्रपती शिवाजी महाराजांनी दिलेला स्वराज्य, सहिष्णुता आणि लोककल्याणाचा मार्ग स्वीकारून परस्पर आदर, ऐक्य आणि समन्वयाने महाराष्ट्र घडवूया ही नम्र विनंती. आणी पुढे भाजपाच्या विखारी, खोडसाळ अपप्रचाराविरुद्ध लढत राहू भाजपच्या विकृतीला व ट्रेड-दिल व जेफ़री एपस्टीन घोटाळा चव्हाट्यावर आणत राहू!

कठीण वज्रास भेदूं ऐसे

भले तरि देऊं कासेची लंगोटी।

नाठाळाचे माथी हाणू काठी।

मायबापाहूनि बहु मायावंत।

करूं घातपात शत्रूहूनि॥

अमृत तें काय गोड आम्हांपुढें।

विष तें बापुडें कडू किती॥

शेवटी जगद्तगुरु संत तुकाराम महाराज यांचा एक अभंग उधृत करत हर्षवर्धन सपकाळ यांनी भाजपवर पुन्हा एकदा निशाणा साधला आहे.