Ajit Pawar : उद्धव ठाकरेंचं 'ते' विधान अन् मुख्यमंत्र्यांना थांबवत अजितदादा म्हणाले, "मी महाविकास आघाडीत असताना..."

सोमवारपासून विधिमंडळाचे अर्थसंकल्पीय अधिवेशन सुरू झाले. आज मंगळवारी ( 27 फेब्रुवारी ) दुसऱ्या दिवशी उपमुख्यमंत्री अजित पवार ( Ajit Pawar ) यांनी विधानसभेत अर्थसंकल्प सादर केले. पण, "निवडणुका डोळ्यासमोर ठेवत हा अर्थसंकल्प मांडला," अशी टीका शिवसेना ( ठाकरे गट ) पक्षप्रमुख उद्धव ठाकरे ( Uddhav Thackeray ) यांनी केली होती. यावर अजित पवारांनी खोचक उत्तर दिलं आहे.

उद्धव ठाकरे काय म्हणाले?

विधिमंडळाबाहेर उद्धव ठाकरेंनी ( Uddhav Thackeray ) प्रसारमाध्यमांशी संवाद साधला. "निवडणुका डोळ्यासमोर ठेवून अर्थसंकल्प सादर करण्यात आला. राज्यातील जिल्ह्यांना अवकाळी पावसाचा फटका जसा बसला, तसाच फटका संकटात सापडलेल्या शेतकऱ्यांना आणि महाराष्ट्राला या घोषणांच्या अवकाळी पावसाचा बसेल, अशी भीती आहे. विकासकामांच्या नावाखाली लाखो, करोडो रूपयांच्या योजनांची घोषणा झाली आहे. पण, शेतकऱ्यांच्या पदरात काहीच पडले नाही," अशी टीका उद्धव ठाकरेंनी अर्थसंकल्पावर केली आहे.

याबद्दल प्रसारमाध्यमाच्या प्रतिनिधीनं मुख्यमंत्री एकनाथ शिंदे यांना प्रश्न विचारला. त्यावर मुख्यमंत्री म्हणाले, "निवडणूक समोर आहेत, म्हणून अर्थसंकल्प सादर करायचा नाही का? विरोधी पक्षाला दुसरं काय येतं?"

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

मुख्यमंत्री बोलत असताना मध्येच अजित पवारांनी ( Ajit Pawar ) बोलायला सुरूवात केली. "महाविकास आघाडी सरकारमध्ये असताना मी अर्थसंकल्प सादर केल्यावर उद्धव ठाकरे कौतुक करायचे. फान छान आहे, फार छान आहे... आता मी इकडे आल्यानं उद्धव ठाकरे तसे म्हणत आहेत. याला काय अर्थ नाही," अशी टोलेबाजी अजित पवारांनी केली.

उपमुख्यमंत्री देवेंद्र फडणवीसांनी म्हटलं, "उद्धव ठाकरेंनी केंद्रीय अर्थमंत्री निर्मला सीतारमण यांच्यासमोर सांगितलं होतं की, 'मला अर्थसंकल्प वगैरे काही कळत नाही.'"