Raj Thackeray on NCP : मी काय बोललो हे न बघताच राष्ट्रवादीने आवई उठवली; राज ठाकरेंचा हल्लाबोल

MNS News : मनसे अध्यक्ष राज ठाकरे यांची आज रत्नागिरीमध्ये सभा पार पडली. यावेळी राज ठाकरे यांनी राष्ट्रवादीचे अध्यक्ष शरद पवार यांच्या राजकारणातून पायउतार होण्याच्या निर्णयावरून विरोधीपक्षनेते अजित पवार यांच्यावर जोरदार टीका केली.

मध्यंतरी राष्ट्रवादी काँग्रेसने आवई उठवली की, अरबी समुद्रात छत्रपती शिवाजी महाराजांचा अश्वारूढ पुतळा उभारण्यास राज ठाकरे यांचा विरोध आहे, मी महाराजांच्या पुतळ्याला विरोध करेन असं कधी तुम्हाला वाटतं का?, असं म्हणत त्यांनी राष्ट्रवादीवर जोरदार टीका केली.

राज ठाकरे म्हणाले, "माझा मुद्दा एवढाच होता की महाराजांच्या समुद्रातील पुतळ्यावर दहा हजार कोटी रुपये खर्च करणार. त्यापेक्षा त्यांनी उभे केलेले गडकिल्ले हे महाराजांचे खरे स्मारक आहेत. त्या गडकिल्ल्यांचे आधी संवर्धन करा फक्त एवढंच माझं म्हणणं होतं. मात्र, माझ्या म्हणण्याचा विपर्यास केला गेला".

"2014 च्या आधी काँग्रेस-राष्ट्रवादी काँग्रेसने अरबी समुद्रात छत्रपती शिवाजी महाराजांचा अश्वारूढ पुतळा उभा करणार असल्याची घोषणा केली होती. मी त्याबाबत काय बोललो हे लक्षात न घेताच राष्ट्रवादीने आवई उठवली होती.

राज ठाकरेंचा या पुतळ्याला विरोध आहे. पण मी महाराजांच्या पुतळ्याला विरोध करेल असं वाटतं तुम्हाला? पण हे बोलणारे राष्ट्रवादी आणि शरद पवार हे महाराजांचे नाव घेत नाहीत, आणि ते मला बदनाम करणार", असं म्हणत त्यांनी राष्ट्रवादीवर जोरदार टीका केली.

आता दुसरीकडे राजीनाम्याचा विषय सुरू होता तो संपला. मला वाटतं की त्यांना (शरद पवार यांना) राजीनामा द्यायचा होता. पण ज्यावेळी राजीनामा द्यायचं जाहिर केलं त्यावेळी अजित पवार कसे बोलत होते? ज्या पद्धतीने अजित पवार बोलत होते ते पाहून शरद पवारांनी राजीमाना माघे घेतला असावा".

"अजित पवार ज्या पद्धतीने अरेरावी करत होते ते पाहून पवार साहेबांच्या मनात विचार आला असणार की राजीनामा दिल्या दिल्याची घोषणा केली तर हा इतका उर्मट वागतोय तर खरंच राजीनामा दिला तर कसा वागेल, म्हणून राजीनामा मागे घेतला असणार", असा टोला राज ठाकरे यांनी अजित पवार यांना लगावला.

(Edited by - Ganesh Thombare)