Summary :
1) सावंतवाडीत संजू परब यांच्या वाढदिवसाला नीलेश राणे आणि दीपक केसरकर उपस्थित होते.
2) यावेळी राणेंनी "संजू परब नक्कीच आमदार होतील" असे वक्तव्य केले.
3) या विधानामुळे शिवसेनेत अंतर्गत राजकीय चर्चेला तोंड फुटले आहे.
Sindhudurg News : एकनाथ शिंदे यांच्या शिवसेनेचे जिल्हाप्रमुख संजू परब यांच्या वाढदिवसानिमित्त सांवंतवाडी येथे मोठा कार्यक्रम झाला. या कार्यक्रमाला शिवसेना नेते तथा माजी मंत्री दीपक केसरकर आणि आमदार नीलेश राणे उपस्थित होते. यावेळी नीलेश राणे यांनी संजू परब यांचा उल्लेख करून "ते नक्कीच आमदार होतील" असे वक्तव्य केल्याने उपस्थितांच्या भुवया उंचावल्या.
केसरकर हे विद्यमान आमदार असून शिंदेंच्या जवळचे नेते आहेत. पण त्यांच्या समोरच अशा पद्धतीने राणेंनी वक्तव्य केल्याने राणेंच्या मनात नेमकं काय आहे असा सवाल आता उपस्थित केला जात आहे. यावेळी केसरकरांनी दिलेल्या सल्ल्याचीही चर्चा होताना दिसत आहे. यावेळी शिवसेना उपनेते संजय आंग्रे, जिल्हाप्रमुख दत्ता सामंत, संजय पडते, महिला जिल्हा आघाडी अध्यक्षा ॲड. निता कविटकर, विधानसभा प्रमुख प्रेमानंद देसाई, तालुका प्रमुख बबन राणे, नितीन मांजरेकर, गणेश प्रसाद गवस उपस्थित होते.
परब हे शिवसेना जिल्हाप्रमुख असून त्यांचा 52 वा वाढदिवस झाला. यावेळी शुभेच्छा देताना आमदार राणे यांनी, परब यांनी नगराध्यक्षपदाच्या काळात आपली क्षमता सिद्ध केली आहे. भविष्यात ते या मतदारसंघातही ती दाखवून देतील. ग्रामीण भागाची जाण असलेला, तळागाळात काम करणारा कार्यकर्ता विधिमंडळात असणे अत्यंत गरजेचे आहे. परब यांना आमदारकीची इच्छा नसली तरी ते एक ना एक दिवस आमदार होणारच, ही शिवसेनेची आणि आमच्या सगळ्यांची जबाबदारी आहे. त्यांना निश्चितच उज्वल भवितव्य असल्याचे म्हणत राणेंनी परब यांना शुभेच्छा दिल्या.
तसेच त्यांनी, ‘परब हे माझ्या भावासारखे असून 16 वर्षांपासून दरवर्षी त्यांच्या वाढदिवसासाठी मी सावंतवाडीत येतो. राजकारणामध्ये चढ-उतार असूनही, पराभवांना तोंड देऊनही परब माझ्यासोबत खंबीरपणे उभे राहिले आहेत. त्यांच्यासारखी प्रामाणिक आणि निस्वार्थ माणसे माझ्यासोबत का राहिली, हे आजही मला कळलेले नाही. त्यांच्याकडे अनेक गुण आहेत आणि त्यांच्या कर्तृत्वानेच त्यांना भविष्यात अनेक पदे मिळतील, याची खात्री त्यांनी बोलून दाखवली.
तसेच परब यांच्याकडे नेतृत्व करण्याची कला आहे आणि ती योग्यरित्या वापरली गेली पाहिजे. त्यांचे योग्य नियोजन तळगाळात पोहोचावे यात परब यांचा हात कोणी धरू शकत नाही. त्यांना नेहमीच आमची साथ आहे व राहिल. यामुळे ते नक्कीच एके दिवशी आमदार होतील असाही दावा केला आहे.
'श्रद्धा व सबुरी' हा मंत्र
यावेळी उपस्थित असणारे दीपक केसरकर यांनी देखील परब यांना शुभेच्छा दिल्या. त्यांनी, ‘परब यांच्यामध्ये एक चांगलं नेतृत्व आहे. त्यांचे वय त्यांच्या बाजूने असल्यामुळे त्यांना राजकारणात खूप मोठं भविष्य आहे. त्यांनी थोडा संयम ठेवल्यास आणि साईबाबांचा 'श्रद्धा व सबुरी' हा मंत्र जपल्यास ते खूप पुढे जातील. मी संजू यांना थोडं शांतपणे घेण्यास सांगितलं, तेव्हा त्यांनी निश्चितपणे संयम बाळगला. त्यांनी अशाच प्रकारे संयमाने काम केल्यास ते निश्चितच खूप पुढे जातील.
परब यांनी राजकारणात काम करताना रस्ते, पाणी आणि वीज या पारंपरिक कामांवर लक्ष केंद्रित न करता लोकांच्या वैयक्तिक विकासावर काम करायला हवे. समाजाला, महिला बचत गटांना काय मिळते, तरुणांना रोजगार कसा उपलब्ध करून देता येईल? शेतकऱ्यांसाठी काय करता येईल? या सगळ्या गोष्टींचा परब यांनी विचार करावा. त्यांच्याकडे समाजसेवेचे व्रत आहे. ते नेहमीच गरीब, गरजू लोकांना आर्थिक मदत करत असतात, त्यामुळे असा व्यक्ती माझ्यासोबत आहे याचा आनंद असल्याचेही केसरकर म्हणाले.
FAQs :
प्र.१: नीलेश राणेंनी काय वक्तव्य केले?
उ.१: त्यांनी "संजू परब नक्की आमदार होतील" असे जाहीरपणे सांगितले.
प्र.२: या कार्यक्रमाला कोण उपस्थित होते?
उ.२: माजी मंत्री दीपक केसरकर आणि आमदार नीलेश राणे उपस्थित होते.
प्र.३: या विधानामुळे काय चर्चा सुरू झाली?
उ.३: या विधानामुळे शिंदे गटात अंतर्गत तणाव आणि नवा राजकीय वाद पेटला आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.