Raigad Diveagar Sea Tragedy : बुडून मृत्यू पावलेल्या 'त्या' आठ विद्यार्थ्यांबाबत सरकारची मोठी घोषणा; कुटुंबीयांना आर्थिक मदत, गोगावलेंनी दिली माहिती

Raigad News : पुण्यातील आळंदी येथून विनर्स अकॅडमीच्या विद्यार्थ्यांची सहल दिवेआगर येथे गेली होती. मात्र, या सहलीदरम्यान आठ विद्यार्थ्यांचा बुडून मृत्यू झाल्याची दुर्घटना घडली होती. ही दुर्दैवी घटना १ ऑक्टोबर रोजी घडली होती. आता या दुर्दैवी घटनेनंतर मृत विद्यार्थ्यांच्या कुटुंबीयांना आधार देण्याचे काम सरकार करत आहे. मृत विद्यार्थ्यांच्या कुटुंबीयांना शासनाकडून प्रत्येकी पाच लाख रुपयांची आर्थिक मदत केली जाणार आहे. याबाबतची माहिती रायगडचे पालकमंत्री भरत गोगावले यांनी दिली आहे.

१ ऑक्टोबर रोजी पुणे, आळंदी येथील विनर्स अकॅडमीचा ४८ जणांचा ग्रुप दिवेआगर समुद्रकिनारी फिरायला गेला होता. यामध्ये शिक्षकांचाही समावेश होता. रायगड किल्ला पाहून झाल्यानंतर हे सर्व विद्यार्थी दिवेआगर समुद्रकिनारी गेले होते.

समुद्राच्या पाण्याचा अंदाज न आल्याने आठ विद्यार्थी पाण्यात बुडाले. या घटनेनंतर राज्यभर खळबळ उडाली होती. तर पुण्यातील आळंदीसह संपूर्ण महाराष्ट्रावर शोककळा पसरली होती. दरम्यान, या घटनेबाबत मंत्री गोगावले यांनी मुख्यमंत्री आणि उपमुख्यमंत्र्यांशी चर्चा केली. या चर्चेनंतर आता मृत विद्यार्थ्यांच्या कुटुंबीयांना प्रत्येकी पाच लाख रुपयांची मदत देण्याचा निर्णय घेण्यात आला आहे.

दिवेआगर येथे घडलेली दुर्घटना अतिशय दुर्दैवी आहे. अशा घटना भविष्यात घडू नयेत, यासाठी शासनस्तरावर आमचा प्रयत्न राहणार आहे. तसेच रायगडमध्ये पर्यटनासाठी येणाऱ्या नागरिकांनी स्वतःच्या जीवाची काळजी घ्यावी, असे आवाहनही मंत्री गोगावले यांनी केले आहे.

याचबरोबर गोगावले यांनी रायगड जिल्ह्यात निर्माण झालेल्या दुष्काळी परिस्थितीवर लक्ष असून, परिस्थितीला तोंड देण्यासाठी प्रशासन सज्ज आहे, असे सांगितले. नियमानुसार आवश्यक ती मदत बाधित शेतकऱ्यांना दिली जाईल. तर परिस्थितीचा आढावा घेण्यात आला असून, यासंदर्भात नुकतीच बैठक घेण्यात आली आहे. त्यामुळे मजुरांनी रोजगारासाठी स्थलांतर करू नये, असे आवाहनदेखील गोगावले यांनी केले आहे.