Sunil Tatkare : शिंदेंच्या उमेदवाराचं खळबळजनक विधान; म्हणाले,'तटकरे हे महायुतीला लागलेले कॅन्सर...'

Raigad News : एकीकडे विधानसभा निवडणुकीची रणधुमाळी सुरू असतानाच महाविकास आघाडी असो वा महायुती दोन्ही बाजूला मतभेद चव्हाट्यावर येत आहे. जागावाटपावरुन कुरघोडीचं राजकारण पाहायला मिळाल्यानंतर आता बंडखोरी, आरोप-प्रत्यारोपांनी नेत्यांमध्ये वाद पेटला आहे.

निवडणुकीला सामोरे जाताना वरिष्ठ नेतेमंडळींकडून सबुरीचा सल्ला दिला जात असतानाच दुसरीकडे स्थानिक पातळीवर कुणीच कुणाशी जुळवून घ्यायला तयार नाही. अशातच आता रायगड जिल्ह्यात महायुतीतील शिवसेना आणि राष्ट्रवादी काँग्रेस अजित पवार यांच्यात आता खटके उडाल्याचे दिसून येत आहे.

विधानसभा निवडणुकीच्या तोंडावर आता महायुतीत रायगडमध्ये राष्ट्रवादी आणि शिवसेनेत वादाची ठिणगी पडली आहे. कर्जत खालापूर हा विधानसभा मतदारसंघ एकनाथ शिंदे यांच्या शिवसेनेच्या वाट्याला आला आहे. या मतदारसंघात शिवसेनेचे महेंद्र थोरवे (Mahendra Thorve) आणि अपक्ष उमेदवार सुधाकर घारे यांच्यात थेट लढत होणार आहे.

पण आता विद्यमान आमदार आणि उमेदवार महेंद्र थोरवे यांनी राष्ट्रवादी काँग्रेस अजित पवार पक्षाचे खासदार आणि प्रदेशाध्यक्ष सुनील तटकरे यांच्यावर सडकून टीका केली आहे.

आमदार महेंद्र थोरवे यांनी मंगळवारी (ता.5) पत्रकार परिषद घेत आपली भूमिका मांडताना खासदार सुनील तटकरे यांच्यावर हल्लाबोल केला आहे. यावेळी त्यांनी सुनील तटकरे (Sunil Tatkare) हे महायुतीला लागलेला कॅन्सर आहे असा घणाघात केला आहे. अपक्ष उमेदवार सुधाकर घारेंना तटकरेंचं मोठं पाठबळ आहे. त्यांनी युतीधर्म मोडला असल्याचा खळबळजनक दावाही आमदार थोरवे यांनी केला आहे.

शिवसेनेचे उमेदवार महेंद्र थोरवे म्हणाले,रायगड जिल्ह्याचा आजवरचा इतिहास जर आपण पाहिला, तर सुनील तटकरे ज्यांच्याशी गोड बोलले आहे, त्या प्रत्येकाचा त्यांनी काटा काढला आहे.त्यांनी अंतुलेंना राजकीयदृष्ट्या संपवलं.शेकापच्या जयंत पाटलांना संपवण्याचं काम सुनील तटकरेंनी केलं.

'सुधाकर घारे हे सुनील तटकरेंचं पाप...'

आता ते माझा घात करण्याचा प्रयत्न करत आहेत. मी तटकरेंना त्यांची जागा दाखवल्याशिवाय राहणार नाही. माझ्याबरोबर प्रत्येकजण उभा आहे. त्यामुळे राष्ट्रवादी महायुतीत यावी हे आम्हाला मान्य नव्हतं. शिवसेना,भाजपा,आरपीआय ही अभेद्य महायुती आहे. ही सक्षमपणे राज्यात उभी आहे, असंही ते म्हणाले. महायुतीकडून लोकसभा निवडणुकीसाठी रायगडची उमेदवारी घोषित झाल्यापासून आम्ही तटकरेंसाठी एकत्रितपणे काम करायला सुरुवात केली. त्यांना विजयही मिळवून दिला.

महायुतीचा धर्म शिवसेना, भाजपा आणि आरपीआयनं जपला आहे. सुधाकर घारे हे सुनील तटकरेंचं पाप आहे, अशी टीकाही महेंद्र थोरवे यांनी केली. महायुतीचं सरकार आणण्याकरिता तिन्ही पक्षाचे नेते प्रयत्न करत आहेत, त्या प्रयत्नांवर पाणी फेरण्याचं काम तटकरे करत असल्याचा आरोपही केला.