MVA protest Mumbai : महायुतीला पैसे मिळाले... महाविकास आघाडीचा जळफळाट; मुंबईच्या रस्त्यांवर उतरणार नेत्यांची फौज

Mumbai News : मुंबई महापालिकेच्या निवडणुकीची घोषणा दिवाळीनंतर होण्याची शक्यता आहे. त्यामुळे सध्या सर्वच पक्ष निवडणुकीच्या कामाला लागले असतानाच आता मुंबई महापालिकेतील निधी वाटपावरून वातावरण चांगलेच तापले आहे. गेल्या पाच वर्षांपासून पालिकेवर प्रशासकांचे राज आहे. त्यामुळे विरोधी पक्षाच्या नगरसेवकांना किरकोळ कामासाठी निधी दिला जात नसल्याने विरोधक चांगलेच आक्रमक झाले आहेत. त्याचमुळे लवकरच मुंबई महापालिकेतील निधी वाटपावरून महाविकास आघाडी उतरणार रस्त्यावर उतरणार असून निवडणुकीच्या तोंडावर घेरण्याची तयारी सुरु केली आहे.

मुंबई महापालिका विसर्जित झाल्यापासून 227 प्रभागातील विकास कामांना खीळ बसला आहे. तर दुसरीकडे मुंबईतील पालकमंत्र्यांनी महापालिकेतील काही अधिकाऱ्यांना हाताशी धरून सत्ताधारी पक्षांचे आमदार व माजी नगरसेवकांना निधीवाटप करीत आहेत, असा दावा विरोधकांनी केला आहे.

त्यांच्या या कृतीमुळे विरोधी पक्षांच्या माजी नगरसेवकाच्या प्रभागावर अन्याय होत आहे. त्यामुळे येत्या काळात महाविकास आघाडीतील काँग्रेस (Congress), उद्धव ठाकरे यांची शिवसेना व शरद पवार यांच्या राष्ट्रवादी काँग्रेसने एकत्रित येत आता आंदोलन करण्याची तयारी केली आहे. त्यासाठी येत्या काळात या तीन पक्षांच्या नेत्याची बैठक होणार असून त्यामध्ये आंदोलनाची रूपरेषा ठरविण्यात येणार आहे.

त्यासोबतच राज्य सरकारकडून पक्षपातीपणाचा निर्णय घेतला जात असल्याने या विरोधात रस्त्यावर उतरण्याची तयारी केली जात आहे. या आंदोलनाच्या माध्यमातून येत्या काळात केवळ महानगरपालिका प्रशासनालाच धारेवर धरले जाणार आहे. त्यासोबतच या मुद्द्यावरून येत्या काळात राज्य सरकारची कोंडी केली जाणार असल्याची माहिती उद्धव ठाकरे (Uddhav Thackeray) यांच्या शिवसेनेच्या नगरसेवकानी दिली आहे.

मुंबई शहर व उपनगरात महाविकास आघाडीचे 10 ते 12 आमदार आहेत. तर त्यासोबतच 60 पेक्षा अधिक माजी नगरसेवक आहेत. त्यामुळे या सर्व मंडळींवर निधी वाटप न करता राज्य सरकारकडून अन्याय केला जात आहे. त्यामुळेच या दुर्लक्ष करीत असलेल्या प्रशासनाचे डोळे उघडण्यासाठी रस्त्यावर उतरण्याची तयारी महाविकास आघाडीकडून केली जात आहे.