Uddhav Thackeray : उद्धव ठाकरेंकडून लाडक्या बहिणींना नवी उपमा, पगारी मतदार! शेतकऱ्यांचे दु:खही सांगितलं!

Uddhav Thackeray Dasara Melava : अतिवृष्टीमुळे शेतकरी अडचणीत आहेत. सरकारच्या मदतीच्या प्रतीक्षेत तो आहे. उद्धव ठाकरेंनी दसरा मेळाव्यात शेतकऱ्यांचे दु:ख मांडताना भाजपवर टीका केली. ते म्हणाले, 'निवडणूक आल्यानंतर महिलांच्या खात्यात दीड हजार रुपये टाकले गेले. जिकडे खायला अन्न नाही तिकडे दीड हजार रुपये मिळत असतील, मुलाबाळांना काही खाऊ देऊ शकत असेल तर ती महिला नाही हे जरा चांगलं चाललंय म्हणेल. पण, शेतकरी बोलला ही भाजपची औलाद आहे ना ती पगारी मतदार तयार करते.'

महाराष्ट्राने ठरवायचे आहे, महिलांनी ठरवायाचे आहे आपल्या पगारी मतदार व्हायचे आहे की स्वाभिमानी मतदार व्हायचे आहे? असा सवाल देखील उद्धव ठाकरेंनी केला. तसेच बिहारसाठी पैशाचा पाऊन मग महाराष्ट्राला मदत का नाही? असा संताप देखील त्यांनी व्यक्त केला.

'आपल्याकडे हे एक फूल आणि दोन हाफ आहेत. एक मुख्यमंत्री आणि दोन मुख्यमंत्री हे तिकडे दिल्ली जाऊन बसायला पाहिजे होते. सगळे निकष बाजुला ठेऊन केंद्रातून आम्हाला मोठी मदत द्या.10, 15, २५ हजार कोटी रुपये आम्हाला द्या, असे त्यांनी म्हटले पाहिजे होते. मात्र, पंतप्रधानांना प्रस्ताव पाहिजे आणि देवेंद्र फडणवीसांचा अभ्यास सुरू आहे. ', असे देखील ते म्हटले.

पुढे बोलताना ते म्हटले, 'देवेंद्र फडणवीसांना माहिती आहे की अभ्यास होईपर्यंत लोक विसरून जातात. जरा काही हातावर टेकवलं तर निवडणुका आपण पार पाडू, असे त्यांना वाटते.'

बिहारला पैसे महाराष्ट्रला का नाही?

'बिहारमध्ये पंतप्रधानांनी महिलांच्या खात्यावर 10 हजार रुपये दिले. त्यासाठी 10 हजार कोटी रुपये खर्च आला. त्यांनी प्रस्ताव दिला होता का? तुम्हाला मत विकत घ्यायला पैसे आहेत पण उद्ध्वस्त झालेल्या महाराष्ट्रासाठी तुमच्याकडे पैसे नाहीत. हा माझा जाहीर आरोप आहे.', असे देखील ठाकरे म्हणाले.

जीएसटी नेहरुंनी लावला का?

महाराष्ट्रावर तुम्ही अन्याय करतायस महाराष्ट्रवर सूड घ्यायचा आहे तुम्हाला, असा भाजपवर ठाकरेंनी आरोप केला. ते म्हणाले, भाजप आणि सरकार यांचा सुतराम संबंध नाही. यांना महोत्सव साजरे करायचे आहेत. आता बचत महोत्सव सुरू केला आहे. अरे आधी जीएसटीमधू आठ वर्ष लुटले कोणी? नेहरुंनी जीएसटी लावला होता का? असा सवाल देखील त्यांनी केला