Manikrao Kokate News : विधानभवनात रमी खेळणाऱ्या कोकाटेंचा गेम : 'क्रीडा व युवक कल्याण मंत्रिपदावर डिमोशन

Manikrao Kokate News : पावसाळी अधिवेशनादरम्यान, महाराष्ट्राच्या विधिमंडळात रमी खेळणाऱ्या माणिकराव कोकाटे यांची कृषी मंत्रिपदावरून उचलबांगडी झाली आहे. त्यांच्याकडे आता क्रीडा व युवक कल्याण, अल्पसंख्यांक विकास व औकाफ खाते सोपविण्यात आले आहे. तर या खात्याचे मंत्री दत्तात्रय भरणे यांच्याकडे कृषी खाते दिले आहे.

बुधवारी (३० जुलै) विधिमंडळाचा चौकशी अहवाल मुख्यमंत्री देवेंद्र फडणवीस यांच्याकडे सादर करण्यात आला. यात कोकाटे सभागृहात केवळ 42 सेकंद नव्हे तर तब्बल 18 ते 22 मिनिटे पत्ते खेळत असल्याचे सांगण्यात आले असल्याचा दावा राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी केला होता.

त्यानंतर आज मुख्यमंत्री देवेंद्र फडणीस यांनी आज राष्ट्रवादी काँग्रेसचे अध्यक्ष तथा उपमुख्यमंत्री अजित पवार, प्रदेशाध्यक्ष सुनील तटकरे यांच्यासोबत कृषिमंत्री कोकाटे यांच्याबाबत चर्चा केली. या चर्चेतील निष्कर्षानुसार कोकाटे यांचे मंत्रिपद वाचले आहे. मात्र, त्यांना कृषिमंत्री पद सोडावे लागले आहे.

अगोदर शेतकरी कर्जमाफी, शेतीमालाचे पडलेले बाजारभाव यामुळे शेतकरी वर्गाची नाराजी सरकारवर आहे. सातत्याने शेतकऱ्यांबद्दल वादग्रस्त विधाने केल्याने मंत्री कोकाटे टीकेचे धनी ठरले होते. अशातच पावसाळी अधिवेशनात विधानभवनात रमी खेळतानाचा व्हिडिओ वायरल झाल्यानंतर कोकाटे यांच्या राजीनाम्यासाठी विरोधक आक्रमक झाले होते.

दोन दिवसांपूर्वी झालेल्या भेटीत अजित पवार यांनी माणिकराव कोकाटे यांना खडेबोल सुनावले होते. आतापर्यंत खूप चुका झाल्या. तुम्हाला खूप सांभाळून घेतले. पण यापुढे माफी नाही, असेही त्यांनी खडसावले होते. त्यामुळे कोकाटे यांचे मंत्रिपद जाण्याची चर्चा होती. मात्र, कोकाटेंचे मंत्रिपद वाचले असून त्यांच्या खात्यात मात्र बदल झाला आहे.