Nilangekar-Solunke Controversy : निलंगेकर साहेबांच्या मुलाने आणि नातवानेच त्यांची अब्रू घालवली; अभय साळुंकेंचा पलटवार

राम काळगे

निलंगा : स्वतःला डॉ. शिवाजीराव पाटील निलंगेकर साहेबांचे वारस म्हणणाऱ्यांना 'अब्रू नुकसान' हा शब्द उच्चारण्याचा नैतिक अधिकार नाही. कारण कारखाने व बँका बुडवून लोकांना फसवत एकमेकांवर 420 चे गुन्हे दाखल करून साहेबांची मुलं व नातवांनीच साहेबांची 'आब्रु' घालवण्याचे पाप केले आहे, असा पलटवार काँग्रेसचे निलंगा मतदार संघातील पराभूत उमेदवार अभय साळुंके यांनी अशोक पाटील निलंगेकर यांच्यावर केला.

निवडणुक काळात आपल्यावर व कुटुंबावर खालच्या पातळीवर जाऊन टीका केल्याचा आरोप करत काँग्रेसचे प्रदेश सरचिटणीस अशोक पाटील निलंगेकर यांनी अभय सांळुके यांच्यावर अब्रुनूकसानाची दावा ठोकरणार असल्याचे सांगितले होते. (Congress) सकाळी पत्रकार परिषद घेत निलंगेकर यांनी आक्रमक भूमिका घेतली होती.

यावर आता साळुंके यांनी पलटवार करत निलंगेकर काका-पुतण्यावर निशाणा साधला आहे. दिवंगत शिवाजीराव पाटील निलंगेकर यांची अब्रु त्यांच्याच मुलाने आणि नातवाने घालवल्याचा आरोप साळुंके यांनी केला. (Latur) उलट साहेबांच्या विचारांचा वारसा जपून आम्ही तीनही तालुक्यातील सर्व काँग्रेस कार्यकर्ते खरे निष्ठावंत आहोत.

आणि मी तर 2019 ला डॉ. शिवाजीराव पाटील निलंगेकर साहेब यांच्यासमोर शिरूर अनंतपाळमध्ये काँग्रेसच्या प्रचार सभेत 'डॉ निलंगेकर साहेब हे निलंगा काँग्रेसचे निष्ठावंत नेतृत्व' होते व आजपासून निलंग्याचं काँग्रेसचे निष्ठावंत नेतृत्व अभय साळुंकेच आहे, असे जाहीर केले होते. डॉ. निलंगेकर साहेबांनीच माझ्या नेतृत्वाला संमती दिली होती.

त्यामुळे पक्षविरोधी काम करणाऱ्यांच्या वक्तव्याला मी फारसं महत्त्व देत नाही. तालुक्यातील जनतेला व कार्यकर्त्यांना सगळे माहीत आहे. मला गुंड व अशिक्षित म्हणणारांवर मीच अब्रुनुकसानीचा दावा करेन, असा इशाराही अभय साळुंके यांनी दिला आहे. एकूणच निलंगेकर-साळुंके संघर्ष येणाऱ्या काळात आणखी भडकण्याची शक्यता नाकारता येत नाही.