Ambadas Danve News : पालघरला विमानतळाच्या बाता करणाऱ्यांनी छत्रपती संभाजी महाराजांच्या नावाच्या फाईलवरची धूळ हटवावी!

Maharashtra Assembly Election 2024 : विधानसभा निवडणुकीच्या प्रचाराला आता वेग आला आहे. महाराष्ट्राच्या या आखाड्यात राज्यातील नेत्यासंह देशपातळीवरील नेत्यांनी प्रचाराच्या आखाड्यात उड्या घेतल्या आहेत. महाविकास आघाडी आणि महायुती अशा दोन्ही बाजूंनी नेत्यांच्या सभांचे आयोजन धुमधडाक्यात सुरू आहे. यातील दावे-प्रतिदावे-आरोप-प्रत्यारोपावरून दोन्ही बाजूने कलगितुरा रंगू लागला आहे.

शिवसेना उद्धव बाळासाहेब ठाकरे पक्षाचे नेते तथा विधान परिषदेचे विरोधी पक्षनेते अंबादास दानवे (Ambadas Danve) यांनी महायुतीच्या धुळ्यातील एका सभेत पालघर येथे विमानतळ बनवण्याचे दिलेल्या आश्वासनाचा दाखला देत भाजप नेत्यांना टोला लगावला आहे. पालघरला विमानतळ बनवण्याच्या बाता आज दिल्लीच्या पातशहांनी धुळ्यात मारल्या.

आमच्या छत्रपती संभाजीनगरच्या विमानतळाला धर्मवीर छत्रपती संभाजी महाराजांचे नाव देण्याच्या फाईलवर पंतप्रधान कार्यालयात एवढी धूळ साचली असावी की त्यावरील अक्षरे आता दिसेनाशी झाली असतील. (Shivsena) काय राव, निर्णय घेण्याची गती तुमची गायब झाली, अन चाकं आमच्या गाडीला नाही म्हणता! मोदींचा महाराष्ट्र आणि मराठी द्वेष यापेक्षा वेगळा काय सांगावा? असा टोला दानवे यांनी लगावला आहे.

नवाब मलिक यांच्या उमेदवारीवरूनही अंबादास दानवे यांनी महायुतीला सुनावले. दुटप्पीपणा हा शब्द सुद्धा लाजवलात आपण देवेंद्र फडणवीस. तुमच्या डोक्यावर मिऱ्या वाटून अजित पवारांनी नवाब मलिक यांना तिकीट दिले. आता तुमच्याच खांद्यावर बसून त्यांच्या प्रचाराला अजित पवार गेले. आता पुरावे काय गाठोड्यात बांधून गंगेत सोडून आले का? देवेंद्र फडणवीससाहेब, अशा शब्दात दानवे यांनी टीका केली.

एकूणच विधानसभा निवडणुकीचा प्रचार पुढे सरकत आहे, तशी विरोधकांकडून महायुतीवर केली जाणारी टीका धारदार होत चालली आहे. महायुतीचे नेतेही महाविकास आघाडीच्या आरोपांना जशासतसे उत्तर देतांना दिसत आहेत.