Shivsena UBT News : 'क्या हुआ तेरा वादा' मंत्री अतुल सावे यांना जाब विचारण्यासाठी अंबादास दानवे थेट भाजप कार्यालयात शिरले!

Marathwada Political News : शिवसेना उद्धव बाळासाहेब ठाकरे पक्षाचे नेते तथा विधान परिषदेतील विरोधी पक्षनेते अंबादास दानवे यांच्या नेतृत्वाखाली छत्रपती संभाजीनगर शहरात आजपासून 'क्या हुआ तेरा वादा' या शीर्षकाखाली राज्यातील महायुती सरकार विरोधात मराठवाड्यातील शेतकऱ्यांच्या प्रश्नावर मोठे जन आंदोलन सुरू करण्यात आले. आंदोलनाच्या पहिल्याच दिवशी अंबादास दानवे आणि शिवसैनिकांनी जिल्हाधिकारी दिलीप स्वामी यांची भेट घेऊन त्यांना निवेदन दिले.

त्यानंतर आंदोलनाच्या रुपरेषेनुसार सत्ताधारी पक्षाच्या मंत्री, आमदार, खासदारांना निवेदन देण्याचा कार्यक्रम हाती घेण्यात आला. (Shivsena UBT) त्यानुसार सायंकाळी पाच वाजता क्रांती चौकातून शिवसैनिक 'क्या हुआ तेरा वादा' अशा घोषणांचे फलक आणि घोषणा देत पायी भारतीय जनता पक्षाच्या गुरुगोविंदसिंगपुरा येथील विभागीय कार्यालयाकडे निघाले. ओबीसी व बहुजन कल्याण मंत्री अतुल सावे व भाजपाचे पदाधिकारी कार्यकर्ते या ठिकाणी आधीपासूनच उपस्थित होते.

शिवसेनिक भारतीय जनता पक्षाच्या (BJP) कार्यालयजवळ येताच भाजप कार्यकर्ते आणि शिवसैनिकांकडून घोषणा युद्ध सुरू झाले. क्या हुआ तेरा वादाला, भाजपकडून लबाड लांडग ढोंग करतयं ने प्रत्युत्तर देण्यात आले. कुठलाही अनुचित प्रकार घडू नये यासाठी भाजप कार्यालयासमोर आधीच मोठा पोलीस बंदोबस्त तैनात करण्यात आला होता. कार्यालयाजवळ पोहोचताच दोन्ही बाजूंनी घोषणा सुरू झाल्या. मात्र काही वेळाने अंबादास दानवे यांनी शिवसैनिकांना उद्देशून रस्त्यावर आपण जितक्या घोषणा द्यायच्या होत्या त्या दिल्या.

आपले हे आंदोलन कोण्या व्यक्तीविरोधात नाही तर सत्ताधाऱ्यांविरोधात आहे. आपण आपले निवेदन मंत्री अतुल सावे यांना देण्यासाठी आलो आहोत. त्यामुळे आता घोषणा थांबवा, असे आवाहन शिवसैनिकांना केले. तर दुसरीकडे भारतीय जनता पक्षाचा विजय असो, अशा घोषणा कार्यालयाच्या समोर उभ्या असलेल्या कार्यकर्त्यांनी दिल्या. त्यांनाही घोषणा थांबवण्याच्या सूचना पदाधिकाऱ्यांनी केल्या.

त्यानंतर अंबादास दानवे, राजू वैद्य, बाळासाहेब थोरात आणि काही निवडक शिवसेनेचे पदाधिकारी भाजपा कार्यालयात गेले. तिथे उपस्थित मंत्री अतुल सावे यांनी या सर्वांशी सविस्तर चर्चा केली. तसेच त्यांचे निवेदन स्वीकारत या सगळ्यांना शेतकऱ्यांच्या प्रश्नावर महायुती सरकारची भूमिका आणि ते करत असलेले काम याची माहिती दिली.

अगदी खेळीमेळीच्या वातावरणात शिवसैनिक आणि भाजप कार्यकर्त्यांमध्ये संवाद झाला आणि शिवसेनेची शिष्टमंडळ अतुल सावे यांना निवेदन देऊन परतले. राज्यात शिवसेना भाजप युती तुटल्यानंतर शिवसैनिकांनी थेट भाजप कार्यालयात धडक देण्याची ही पहिलीच वेळ असावी. शिवसेनेच्या या आंदोलनाने सगळ्यांचे लक्ष मात्र वेधून घेतले.