Babanrao Lonikar -''रक्ताचा शेवटचा थेंब असेपर्यंत, मी..'' ; वादग्रस्त वक्तव्यानंतर आता बबनराव लोणीकरांचं स्पष्टीकरण!

BJP MLA Babanrao Lonikar Clarification - भाजप आमदार बबनराव लोणीकर यांच्या वादग्रस्त वक्तव्यानंतर आता राजकारण तापलं आहे. विरोधकांनी हा मुद्दा उचलून धरत लोणीकरांसह सरकारवर जोरदार टीका सुरू केली आहे. तर सत्ताधारी पक्षातील नेत्यांकडूनही लोणीकरांच्या वक्तव्यावर प्रतिक्रिया येऊ लागल्या आहेत. दरम्यान, मुख्यमंत्री फडणवीसांनीही लोणीकरांच्या या वादग्रस्त वक्तव्याची दखल घेत, त्यांना एकप्रकारे समज दिल्याचे समोर आले.

या सर्व घडामोडीनंतर आता खुद्द बबनराव लोणीकर यांनी आपल्या त्या वादग्रस्त वक्तव्यावर स्पष्टीकरण दिलं आहे. लोणीकर म्हणाले, राजकीय पक्षांच्या एक दहा जणांचं टोळकं आहे, की जे आमच्याविरोधात बोलतं, ट्रोल करतं. आमची खेड्यातली भाषा आहे. आम्ही वडिलांना बाप म्हणतो, आईला खेड्यात माय म्हणतात आणि जर आपल्या एखाद्या मुलाने काम केलं नाही किंवा मुलगा नीट शिकत नाही, त्याला कारटं म्हणतात. ही बोलू भाषा आहे. आमच्य मतदारसंघात, ग्रामीण भागात जी भाषा कळते, त्या भाषेत मी बोललेलो आहे.

तसेच, मी कोणत्याही कोणत्याही जनतेविरोधात, शेतकऱ्यांच्याविरोधात बोललेलो नाही. माझ्या रक्ताचा शेवटचा थेंब असेपर्यंत मी कधीही गरीब माणसाच्याविरोधात किंवा शेतकऱ्यांच्या विरोधात बोललो नाही आणि बोलणारही नाही. असंही लोणीकरांनी सांगितलं आहे.

याशिवाय, या वक्तव्याबद्दल चुकीचे बोललो नसलो तरी शेतकऱ्यांची माफी मागतो, अशा शब्दात लोणीकर यांनी दिलगिरी व्यक्त करत आखडती माफी मागीतली. मी शेतकऱ्यांविरोधात मरेपर्यंत बोलणार नाही. मी शेतकऱ्यांमुळेच आहे. राजकीय नेत्यांकडून पैसे घेऊन सोशल मीडियावर मला ट्रोल करणाऱ्या टोळक्या विरोधात मी बोललो असल्याचे लोणीकर यांनी स्पष्टीकरण दिले आहे.

कुचरवट्यावर बसलेली काही रिकामटेकडी कार्टी सोशल मीडियावर पंतप्रधान नरेंद्र मोदी आणि मुख्यमंत्री देवेंद्र फडणवीस (Devendra Fadnavis) यांना अंधभक्त म्हणतात. हीच कार्टी कूचरवट्यावर बसून चर्चा करत असतात पण त्यांच्यापैकी काहींच्या आईचा पगार व बापाचे पेन्शन बबनराव लोणकर यांनीच दिलं आहे. नरेंद्र मोदींनी तुझ्या बापाला पेरणीसाठी सहा हजार रुपये दिले, असे वादग्रस्त वक्तव्य लोणीकर यांनी केले. यानंतर राज्यभरातील विविध पक्षाचे नेते लोणीकर यांच्यावर तुटून पडले आहेत.

(Edited by - Mayur Ratnaparkhe)