Dharashiv Shiv Sena News : शिवसेनेच्या सर्जिकल स्ट्राईकनंतर 'धाराशिव' नगरपालिकेत पुन्हा मोठा ट्विस्ट; शिंदेंनंतर भाजपही 'अ‍ॅक्शन मोड'वर, गटनेत्यासाठी टाकलं जाळं?

Dharashiv Politics News : धाराशिव नगरपालिकेतील उद्धव ठाकरे यांच्या शिवसेनेला खासदार ओम राजेनिंबाळकर यांनी मोठा धक्का दिला आहे. बुधवारी रात्री सातपैकी 4 नगरसेवक गळाला लावले आहेत. या चार नगरसेवकानी उपमुख्यमंत्री एकनाथ शिंदे यांच्या उपस्थित शिवसेनेत प्रवेश केला. त्यामुळे आता धाराशिव पालिकेतील समीकरण बदलले असून एकही नगरसेवक नसलेल्या शिवसेनेचे संख्याबळ आता चार झाले आहे. त्यातच आता पाचवा नगरसेवक भाजपच्या वाटेवर असल्याचे समजते. विशेषता हा पाचवा नगरसेवक गटनेता असल्याने त्यांच्या भूमिकेला महत्त्व प्राप्त झाले आहे. तर उर्वरित दोन नगरसेवक हे उद्धव ठाकरे यांच्या शिवसेनेसोबत राहणार असल्याचे त्यांनी स्पष्ट केले आहे.

धाराशिव नगरपालिकेतील ठाकरेंचे चार नगरसेवक मंगळवारी भाजप प्रवेशासाठी मुंबईकडे निघाले होते. मात्र, रस्त्यातच नाट्यमय घडामोडी घडल्या. त्यानंतर या ठाकरे सेनेचे चारही नगरसेवक भाजपसोबत गेले नाहीत. अर्ध्या वाटेतून परतत असताना खासदार ओम राजेनिंबाळकर यांनी गेम फिरवला. या चार नगरसेवकांना सोबत घेत बुधवारी ठाण्यात जाऊन पक्षप्रमुख तथा उपमुख्यमंत्री एकनाथ शिंदे यांच्या हस्ते प्रवेश केला.

प्रवेश केलेल्या या चार नगरसेवकात प्रदीप मुंडे, नाना घाडगे, सोनाली अमित उंबरे व करवर यांचा समावेश आहे. यावेळी खासदार ओम राजेनिंबाळकर यांच्यासह सहसंपर्कप्रमुख सुरज महाराज साळुंके, ऋषी मगर, सोमनाथ गुरव यांच्यासह धाराशिव जिल्ह्यातील नेतेमंडळी व पदाधिकारी उपस्थितीत होते.

चार जणांनी शिवसेनेसोबत गेले आहेत. त्यातच आता उद्धव ठाकरे यांच्या शिवसेनेचे गटनेते राजाभाऊ पवार यांनी गुरुवारी डॉ. पद्मसिंह पाटील यांचे आशीर्वाद घेतले. त्यामुळे पवार हे भाजपच्या वाटेवर असल्याची चर्चा रंगली आहे. एकीकडे धाराशिव नगरपरिषदेत उद्धव ठाकरे यांच्या शिवसेनेचे नगरसेवक फोडण्याचा व पक्षप्रवेशाचा घटनाक्रम सुरु असताना गटनेते राजाभाऊ पवार यांनी ज्येष्ठ नेते डॉ पद्मसिंह पाटील यांची भेट घेत आशीर्वाद घेतले.

यावेळी आमदार राणाजगजीतसिंह पाटील, युवा नेते मल्हार पाटील, मनोगत शिनगारे हे उपस्थितीत होते. एकीकडे ठाकरेंचे 4 नगरसेवक हे शिवसेना शिंदे गटात गेले असताना पवार हे त्यांच्यासॊबत येतील असे वाटत असताना ते भाजपच्या वाटेवर असल्याचे या निमित्ताने शिक्कामोर्तब झाले आहे. गटनेते म्हणुन पवार हे भाजपच्या माध्यमातून कोणती कायदेशीर खेळी खेळणार ? याकडे सर्वांचे लक्ष लागले आहे.

दुसरीकडे सात पैकी पाच नगरसेवक शिवसेना सोडून जाणार हे जवळपास निश्चित झाले असताना आता उद्धव ठाकरे यांच्या शिवसेनेसोबत दोन शिलेदार राहणार आहेत. तसे नगरसेवक रवी वाघमारे, राज निकम यांनी स्पष्ट केले आहे. त्यामुळे शिंदे शिवसेनेसोबत पाच तर ठाकरे सेनेसोबरत दोन तर भाजपसॊबत एक नगरसेवक राहण्याची शक्यता आहे. त्यामुळे आता सर्वांचे गटनेत्याच्या भूमिकेकडे सर्वांचे लक्ष लागले आहे.