Santosh Bangar : उमेदवार पाडा अन् 71 लाख जिंका; शिंदेंच्या शिलेदारानं पुन्हा ठोकली हाबूक!

Hingoli Zilla Parishad election : एकनाथ शिंदे शिवसेनेचे आमदार संतोष बांगर हे वेगवेगळ्या कारणास्तव चर्चेत असतात. आता पुन्हा एकदा विरोधकांना चॅलेंज करत, संतोष बांगर यांनी लावलेली पैजामुळे ते चर्चेत आली आहे.

संभाव्य जिल्हा परिषद निवडणुकीच्या पार्श्वभूमीवर संतोष बांगर यांनी तब्बल 71 लाख रुपयांची पैज लावली आहे. विरोधकांना हे चॅलेंज देताना, संतोष बांगर यांनी हाबूक देखील ठोकली आहे.

राज्यात महापालिका निवडणूक प्रचार शिगेला पोहोचला आहे. महायुतीमधील भाजपविरुद्ध (BJP) एकनाथ शिंदे शिवसेना, असा अनेक ठिकाणी सामना रंगला आहे. तसंच एकनाथ शिंदे शिवसेनेची बऱ्याच ठिकाणी शिवसेना उद्धव बाळासाहेब ठाकरे सेना पक्ष आणि मनसेच्या युतीशी लढत आहे.

एकनाथ शिंदे (Eknath Shinde) महापालिका निवडणुकीत मित्रपक्ष भाजप आणि विरोधकांशी दोन हात करत असतानाच, हिंगोली कळमनुरी विधानसभा मतदारसंगाचे आमदार संतोष बांगर यांनी जिल्हा परिषदेच्या निवडणुकीच्या पार्श्वभूमीवर लावलेल्या 71 लाखांच्या पैजेमुळे चर्चेत आले आहेत.

कळमनुरी विधानसभा मतदारसंघातील पिंपळदरी गावात यात्रेच्या निमित्ताने आमदार संतोष बांगर यांनी कुस्तीच्या मैदानात उपस्थिती आमदार बांगरांनी या भागातील शिवसेनेचे कार्यकर्ते संजय भुरके यांना थेट जिल्हा परिषदेची उमेदवारी जाहीर केली. भुरके यांना जिल्हा परिषद निवडणुकीत विजयी करणार असल्याचे सांगत 51 लाख रुपयांची पैज लावली आहे.

धक्कादायक म्हणजे, संजय भुरके यांना पराभूत करा आणि 51 लाखांचे 71 लाख रुपये माझ्याकडून इनाम घेऊन जा, असं आमदार बांगर यांनी म्हटले. दरम्यान संतोष बांगर यांच्या या पैजेमुळे पुन्हा एकदा नव्या वादाला तोंड फुटले आहे. विरोधकांनी आमदार बांगर यांच्या या पैजेच्या प्रकारावर टीका सुरू केली आहे. याबाबत विरोधकांनी कायदेशीर तक्रार होते का, याची देखील चाचपणी सुरू केल्याची सूत्रांची माहिती आहे.