Ashok Chavan : अशोक चव्हाण यांच्याकडून इंधन दरवाढीचे समर्थन; म्हणाले, संकटातही भारत ठामपणे उभा!

Petrol Price Hike News : पश्चिम आशियातील युद्धाचा फटका भारतासह जगातील अनेक राष्ट्रांना बसला आहे. विशेषतः गॅस, पेट्रोल, डिझेलचा तुटवडा आणि आता इंधनाचे दर वाढल्याने सर्वसामान्यांना महागाईचे चटके बसू लागले आहेत. पेट्रोलच्या दरात प्रतिलिटर तीन रुपयांनी वाढ झाल्यानंतर याबद्दल प्रतिक्रिया उमटू लागल्या आहेत.

भाजपचे खासदार अशोक चव्हाण यांनी मात्र इंधन दरवाढीचे समर्थन करतांना भारत जागतिक संकटासमोर ठामपणे उभा असल्याचे म्हटले आहे. हा दावा करताना अशोक चव्हाण यांनी जगभरातील देशांमध्ये इंधनाचे गगनाला भिडलेले दर आणि भारतात नाममात्र झालेली वाढ याची तुलना करणारा तक्ताच आपल्या सोशल मिडियावरील पोसर्टमधून मांडला आहे.

पश्चिम आशियातील संकटानंतर जगभरात इंधनाचे दर गगनाला भिडले असताना भारत मात्र जागतिक संकटासमोर ठामपणे उभा राहिला, असा दावा करतानाच जागतिक स्तरावर पेट्रोलच्या किंमतीत झालेली प्रचंड वाढ त्यांनी अधोरेखित केली आहे. यात पाकिस्तानमध्ये इंधनाचे दर तब्बल 55 टक्क्यांनी वाढले आहेत. तर मलेशिया 56%, अमेरिका ४५%, युएई (UAE) 52%, तर म्यानमारमध्ये 90% इंधन दरवाढ झाली आहे.

अनेक देशांमध्ये डिझेलच्या किंमती 50 ते 100 टक्क्यांनी वाढल्या. पण भारतात? पेट्रोल फक्त 3.2 तर डिझेल 3.4% एवढ्याच दराने वाढले आहे. जागतिक बाजारात कच्च्या तेलाचे वाढते दर आणि 'होर्मुझच्या सामुद्रधुनी'मधील विस्कळीत पुरवठ्यानंतरही सलग 76 दिवस मोदी सरकारने या महागाईचा भार सामान्य जनतेवर पडू दिला नाही, तर तो स्वत: घेतला, याबद्दल अशोक चव्हाण (Ashok Chavan) यांनी केंद्रातील मोदी सरकारचे कौतुक केले आहे.

जगातील बहुतांश देशांनी महागाईचा थेट फटका आपल्या जनतेला दिला, तर भारताने मध्यमवर्गीय कुटुंबे, वाहतूक खर्च, अन्नधान्याचे भाव आणि महागाईवर नियंत्रण ठेवले आहे. अनेक प्रगत देशांमध्ये परिस्थिती गंभीर झालेली असतानाना भारत मात्र या जागतिक संकटांचा खंबीरपणे सामना करतोय, असेही चव्हाण यांनी नमूद केले आहे.