Balraje Pawar Arrest : बीडमध्ये मोठी राजकीय घडामोड : बाळराजे पवारांना अटक; नगराध्यक्षपदाच्या निकालापूर्वीच कारवाई

Beed District Politics : नगरपालिका निवडणुकीसाठी मतदान सुरू असतांनाच गेवराई येथे 2 डिसेंबर रोजी भाजपचे बाळराजे पवार आणि राष्ट्रवादी काँग्रेसचे माजी आमदार अमरसिंह पंडित यांच्या समर्थकांमध्ये मोठा राडा झाला होता. दगडफेक, एकमेकांच्या घरावर, पक्ष कार्यालयावर चाल करून जात केलेल्या हाणामारीमुळे गेवराईतील वातावरण बिघडले होते.

आता याच प्रकरणात पोलीसांकडून गुन्हा दाखल झाल्यानंतर काल मध्यरात्री माजी आमदार लक्ष्मण पवार यांचे बंधु व भाजपच्या नगराध्यक्ष पदाच्या उमेदवार गीता पवार यांचे पती बाळराजे पवार यांना अटक करण्यात आली आहे. गेवराई नगरपालिका निवडणुकीत पवार विरुद्ध पंडीत अशा दोन राजकीय घराण्यांची प्रतिष्ठा पणाला लागली होती.

या दोन कुटुंबामध्ये असलेल्या संघर्षचा भडका दोन डिसेंबर रोजी उडाला होता. गेवराईतील राडा हा एकमेकांना जीवे मारण्याच्या षडयंत्राचा भाग होता, असा आरोप दोन्ही बाजूंनी करण्यात आला होता. बीडचे पोलीस अधीक्षक नवनीत काँवत यांनी दोन्ही बाजूच्या कार्यकर्त्यांवर गुन्हे दाखल करत पोलीसी खाक्या दाखवला होता.

त्यानंतर आता काल मध्यरात्री बाळराजे पवार यांना गेवराई पोलीसांनी अटक करत मोठी कारवाई केली आहे. मात्र बाळराजे पवार हे रात्री स्वतःहून गेवराई पोलीस ठाण्यात हजर झाल्याचे सांगण्यात येत आहे. मतदानाच्या दिवशीच गेवराईत दगडफेक, हाणामारी आणि एकमेकांच्या घर व पक्ष कार्यालयावर चाल करून गेल्याच्या घटनेने बीड जिल्ह्यातील वातावरण तापले होते. स्वतः एसपी नवनीत काँवत यांनी गेवराईत येऊन परिस्थिती हाताळली होती.

तसेच हल्लेखोरांना जिल्ह्यातून हद्दपार करण्याची तसेच पोलीस स्वतः फिर्यादी होऊन गुन्हे दाखल करत कारवाई करेल, असे त्यांनी स्पष्ट केले होते. त्यानूसार गेवराई पोलिसांनी 50 जणांविरुद्ध गुन्हे दाखल केले होते. यात बाळराजे पवार यांचाही समावेश होता. सुरुवातीला अनेक आरोपींना ताब्यात घेऊन नोटीस बजावण्यात आली होती. मात्र, तपासादरम्यान बाळराजे पवार यांच्यावरील आरोपांची व्याप्ती आणि गुन्ह्यातील कलमांमध्ये वाढ झाल्याने पोलिसांनी त्यांना अटक केल्याचे बोलले जाते.

अटकेच्या पार्श्वभूमीवर गेवराई शहरात आणि पोलीस ठाणे परिसरात मोठा पोलीस बंदोबस्त तैनात करण्यात आला आहे. थेट बाळराजे पवार यांनाच अटक करण्यात आल्याने ही कारवाई राजकीय दबावातून केल्याचा आरोप पवार समर्थकांकडून केला जात आहे. अटकेच्या कारवाईनंतर हा वाद अधिक चिघळण्याची शक्यता लक्षात घेऊन खबरदारी म्हणून परिसरात पोलीस बंदोबस्त वाढवण्यात आला आहे. पोलीसांनी त्यांना गेवराई न्यायालयात हजर केले आहे.

तीन महिन्यापुर्वीच झाली होती सुटका..

बाळाराजे पवार यांची तीन महिन्यापुर्वीच जन्मठेपेच्या शिक्षेतून सुटका झाली होती. वीस वर्षापुर्वीच्या एका खून प्रकरणात बाळराजे पवार हे जन्मठेपेची शिक्षा भोगत होते. चांगल्या वर्तणुकीमुळे त्यांची तुरुंगातून सुटका झाली होती. जेलमधून बाहेर आल्यानंतर लगेचच त्यांनी गेवराई नगरपालिका निवडणुकीसाठी तयारी सुरू केली होती.

भाजपमध्ये प्रवेश करत त्यांनी पत्नी गीता यांना नगराध्यक्षपदाची उमेदवारीही मिळवून दिली होती. निवडणुक प्रचार किरकोळ प्रकार वगळता शांततेत पार पडला होता. परंतु मतदानाच्या दिवशी घडलेल्या प्रकाराने बाळराजे यांच्यावर पुन्हा पोलीस कारवाईला सामोरे जाण्याची वेळ आली आहे.