Jalna News: माजी मंत्री लक्ष्मण ढोबळे अडचणीत, जालन्यातील वादग्रस्त वक्तव्यावरून गुन्हा दाखल

FIR Against Laxman Dhoble: माजी मंत्री तसेच राष्ट्रवादी शरदचंद्र पवार पक्षाचे उपाध्यक्ष लक्ष्मण ढोबळे यांच्याविरोधात गुन्हा दाखल करण्यात आला आहे. जालना जिल्हाधिकारी कार्यालयासमोर मातंग समाजाच्या वतीने आयोजित मोर्चात महिलांबाबत आणि इतर समाजावर ढोबळे यांनी आक्षेपार्ह वक्तव्य केले होते. या वक्तव्यावरून ढोबळे यांच्याविरोधात गुन्हा दाखल करण्यात आला आहे. वजिराबाद पोलीस ठाण्यात २१ सप्टेंबर रोजी हा गुन्हा नोंदवण्यात आला.

आरक्षण वर्गीकरणाच्या मुद्द्यावरून १३ सप्टेंबर रोजी जालना जिल्हाधिकारी कार्यालयासमोर मातंग समाजाच्या वतीने मोर्चा व सभेचे आयोजन करण्यात आले होते. या सभेतील भाषणादरम्यान माजी मंत्री लक्ष्मण ढोबळे यांनी महिलांबाबत तसेच दोन समाजांमध्ये तेढ निर्माण करणारे आक्षेपार्ह वक्तव्य केले होते. या वक्तव्यानंतर सामाजिक स्तरावर तीव्र संताप व्यक्त करण्यात आला होता.

सामाजिक कार्यकर्त्या अंजली सुरेश गायकवाड यांनी या प्रकरणी तातडीने जिल्हाधिकारी आणि जिल्हा पोलीस अधीक्षक यांची भेट घेत, संबंधित भाषणाचे रेकॉर्डिंग तपासून गुन्हा दाखल करण्याची मागणी त्यांनी प्रशासनाकडे लावून धरली होती. त्यांच्या तक्रारीची दखल घेत पोलिसांनी भारतीय न्याय संहितेच्या कलम ३५३(२) आणि १९६ अंतर्गत ढोबळेवर कारवाई केली आहे.

सीसीटीव्ही फुटेज आणि व्हायरल रेकॉर्डिंगचा आधार

वजिराबाद पोलिसांनी या प्रकरणात प्राप्त झालेले सीसीटीव्ही फुटेज तसेच सोशल मीडियावर व्हायरल झालेले रेकॉर्डिंग तपासून गुन्हा नोंदवला आहे. घटनेच्या ९ दिवसांनंतर गुन्हा दाखल झाल्याने या विलंबावरही आता चर्चा सुरू झाली आहे.

याबाबत बोलताना फिर्यादी व सामाजिक कार्यकर्त्या अंजली गायकवाड म्हणाल्या की, त्यांनी जिल्हाधिकारी आणि पोलीस अधीक्षकांकडे सातत्याने या घटनेचा पाठपुरावा केल्यानंतर रेकॉर्डिंगची शहानिशा करून गुन्हा दाखल करण्यात आला आहे.

या प्रकरणी पुढील तपास वजिराबाद पोलीस ठाण्याकडून सुरू असून, आगामी काळात याबाबत अधिक कारवाई होण्याची शक्यता आहे.