Jayant Patil Big Statement : 'येत्या महिन्याभरात दिल्लीत मोठी राजकीय उलाढाल...'; शरद पवारांचा थेट जयंत पाटलांना फोन

Pandharpur News : नुकत्याच पार पडलेल्या विधान परिषदेच्या निवडणुकीत शेकापच्या जयंत पाटलांचा धक्कादायक पराभव झाला होता. या पराभवानंतर त्यांनी महाविकास आघाडीवर टीकेची झोड उठवली होती. पण त्यांनी मविआची साथ सोडली नव्हती. आता जयंत पाटलांनी मोठा दावा करतानाच राजकीय वर्तुळात खळबळ उडवून दिली आहे.

शेतकरी कामगार पक्षाचं 19 वे राष्ट्रीय अधिवेशन शुक्रवारी (ता.2) पंढरपूर येथे सुरू झाले .या अधिवेशनासाठी प्रमुख पाहुणे म्हणून शरद पवार (Sharad Pawar) यांना बोलावण्यात आले होते. मात्र, ते या अधिवेशनाला आलेच नाही. त्यामुळे त्यांनी शेकापच्या अधिवेशनाकडे पाठ फिरवले की काय अशी चर्चा जोर धरू लागली आहे.

शरद पवारांच्या न येण्यामागचं कारण सांगतानाच शेकापच्या जयंत पाटलांनी मोठं विधान केलं आहे. त्यांनी दिल्लीमध्ये या महिन्यामध्ये मोठी राजकीय उलाढाल होत असून त्यामुळे मी येऊ शकत नसल्याचं फोनद्वारे शरद पवार यांनी सांगितले आहे. त्यामुळे येत्या काही दिवसांत दिल्लीत मोठ्या घडामोडी नेमक्या काय घडणार आहेत याबाबत तर्क-वितर्कांना उधाण आले आहेत.

जयंत पाटील (Jayant Patil) म्हणाले, शरद पवारांनी दोन दिवसांपूर्वी फोन करून दिल्लीत मोठी राजकीय घडामोड सुरू असल्याचे सांगितले होते. या महिन्यात ती घडणार असल्यामुळे मला शेकापच्या अधिवेशनाला यायला जमणार नसल्याचं शरद पवार यांनी सांगितलं होतं.

यावेळी आपण त्यांना दिल्लीतलं सरकार पाडा आणि मग या.आम्ही तुमचे स्वागत करू अशा शुभेच्छा दिल्या असंही जयंत पाटील म्हणाले. या अधिवेशनास शेतकरी कामगार पक्षाच्या पदाधिकार्‍यांनी मोठ्या प्रमाणात हजेरी लावली.

चार महिन्यांतच केंद्रातील सरकार बदलणार...

केंद्रातील भाजप सरकार चार महिन्यांतच बदलणार आहे.त्यानंतर दिल्लीतील सरकारमध्ये पृथ्वीराज चव्हाण जातील. मी इंडिया आघाडीचा सदस्य आहे म्हणून सांगतोय, असा विश्वास शेतकरी कामगार पक्षाचे नेते जयंत पाटील यांनी व्यक्त केला. त्यांचा या दाव्याने राज्याच्या राजकारणात एकच खळबळ उडाली आहे.