Abdul Sattar : 'मांसाहार करूनच घराबाहेर...'; अब्दुल सत्तार शंकराच्या मंदिरात गेल्याने नवा वाद, तरूणांनी गोमूत्र शिंपडलं तर भाजपच्या तुषार भोसलेंनीही सुनावलं

Abdul Sattar non-veg controversy at Shankar temple: राज्यासह देशभरात काल महाशिवरात्रीचा सण अत्यंत उत्साह आणि भक्तीभावाने साजरा करण्यात आला. महाशिवरात्रीच्या निमित्ताने अनेक नेत्यांनी विविध शिवमंदिरांमध्ये जाऊन भगवान शंकराचा अभिषेक केला.

मात्र, उपमुख्यमंत्री एकनाथ शिंदेच्या शिवसेनेचे नेते तथा राज्याचे माजी मंत्री अब्दुल सत्तार यांनी एका मंदिरात जाऊन दर्शन घेतल्यावरून आता नवा वाद सुरू झाला आहे. मिळालेल्या माहितीनुसार संभाजीनगर जिल्ह्यातील रहिमाबाद येथील नागेश्वर मंदिरात जाऊन अब्दुल सत्तार यांनी दर्शन घेतलं.

यावर काही तरूणांनी आक्षेप घेत थेट गोमूत्र शिंपडून मंदिर स्वच्छ केल्याचा धक्कादायक प्रकार समोर आला आहे. यामुळे आता नवा वाद सुरू झाला असून स्थानिक तरूणांनी सत्तार हे रोज मांसाहार करून घराबाहेर पडतात. त्यामुळे त्यांना मंदिरात जाऊन दर्शन घेण्याचा अधिकार नाही असा दावा केला आहे.

तर सत्तारांनी दर्शन घेतल्यानंतर तरूणांनी मंदिर स्वच्छ केल्याचे काही व्हिडिओ देखील सोशल मीडियावर व्हायरल होत आहेत. तर दुसरीकडे भाजपचे अध्यात्मिक आघाडीचे प्रमुख तुषार भोसले यांनी देखील या घटनेचं समर्थन केलं आहे.

शिवाय त्यांनी सत्तारांनी मंदिरात जाणं चुकीचं असल्याचं म्हटलं आहे. भोसले म्हणाले, "अब्दुल सत्तारांनी हिंदू धर्मात प्रवेश केलाय का? आणि नसेल केला तर त्यांनी बाहेरून दर्शन घ्यायला पाहिजे होतं. आमच्या देवी देवतांची मंदिरं काही स्मारकं नाहीत.

हिंदू धर्मात गर्भगृहाचे काही धार्मिक नियम असतात. राजकीय फायद्यासाठी आमचे धार्मिक नियम मोडू नका. आणि तुम्हाला खूपच इच्छा असेल तर हिंदू धर्मात प्रवेश करा आणि खुशाल देवी देवतांचे आशीर्वाद घ्या.", अशा शब्दात भोसले यांनी सत्तार यांच्या दर्शन घेण्यावर आक्षेप घेतला आहे.